2016/09/22

《男人最可惜係未盡全力》

2016_09_22_蔣薇_MenClub Column 2

2016_09_22_蔣薇 Menclub
 
圖片來源:互聯網
 
問你一個簡單問題:請問你覺得你老闆/公司用到你幾成力?
 
或者你會答,間仆街公司用到我盡,用到十二成都嚟緊啊!雖然奴味好重,但我都想講句,盡咗力,好過盡唔到力。
 
同幾個朋友講開呢條問題,原來好多人覺得自己用得三到六成力,返工放工好似斬瓜切菜咁,輕輕鬆鬆又到六點鐘,啲嘢搞掂唔駛OT,遊刃有餘咪就係呢啲。
 
聽落好開心,但用力愈少嘅人,就愈無心機,無士氣。咁大個人,懶就當然想,但經常都係遊遊吓又會覺得自己浪費時間,經過磨練同社會洗禮,練得一身好武功,邊個想做豬肉佬?
 
就好似C朗明明一個可以扭十個,點知你個領隊就同佢講:「我哋呢種傳統隊伍,打穩守鐵筒戰術,你返嚟防守得喇,入唔入波係其次,最緊要唔好失波!當你幻想C朗喺後場輕輕鬆鬆踢波,完場都無乜出過汗嗰陣,完場嗰時你一定問自己,究竟自己頭先做乜撚嘢??
 
更令人氣餒係,你仲要交波俾唯一嘅老套前鋒,打足十年都係同一套路,又慢,又無速度,無唔快,等佢入波仲難過對方Own Goal,之不過老闆,啊唔係,係領隊又好鐘意佢打法喎,無它,因為領隊都係呢種老套到死嘅人。
 
有一次你忍唔住口同個前鋒講,不如試吓入佢中路?佢就會搬出一個老屎忽樣同你講,波,笨唔係咁踢,阿叔我踢咗咁多年,知道晒點玩個遊戲,你嗰套唔啱我哋。當你偶爾交到個靚波,又或者係戰術上做咗嘢成功令佢入球,佢都係會以為係自己能力。
 
久而久之,你都懶得再用力,只做返自己本份。
 
四下無人之時,你會幻想自己係條跑道上出盡全力係咩樣,你會想知道自己嘅極限喺邊,你會想挑戰自己,你會想熱血一次。
 
Hea?只係小朋友先會憧憬,當你有返咁上下年紀,你好明白人生不能再Hea,因為再唔衝,就衝唔到。
 
事業帶俾男人嘅,除咗金錢,仲有滿足感,就好似性愛一樣,滿足不單單係一秒鐘的快感,更係整個過程,筋疲力盡嘅感覺更美妙。
 
男人就係要走,如果呢條跑道令你出唔到全力去走,走啦,走去另一條令你盡到全力嘅跑道。
 
一路跑,一路大叫:出盡全力,連我自己都驚啊!!!!!!!
 
蔣薇
www.fb.com/maydreaming

COMMENT