2016/09/30

《對男人講,女朋友去旅行就好似中六合彩咁》

2016_09_30_蔣薇MenClub Column
 
圖片來源:互聯網
 
相信每個男人都曾經試過女朋友去旅行,無王管三五日,感覺就好似突然中六合彩咁,有咁多錢係手,我唔撚識洗啊!!!
 
問問你,如果你有三日自由時光,你會做乜?
 
我知實有人話要做返個大丈夫,但通常都係得個講字,而我幻想中嘅三日,係咁過的……
 
第一日係屋企瞓到黃朝百晏,你唔需要趕出去同伴侶約會,更唔需要為今日去邊而煩惱,瞓喺床上面打吓機,然後餓就起身,去返中學時代日日食嘅餐廳,嚟個懷緬過去常陶醉,跟住行吓信和,買返晒之前無買嘅動漫玩具,記得買住想玩好耐,又無時間玩嘅Game,之後有用。然後就當然係約班死黨一齊食個飯,打住一個女朋友去旅行,我自由喇嘅旗號,通常都一呼百應,而作為主角嘅你,必須發表不少於五分鐘嘅感言,碰杯之後大家露出一個I Know That Feel嘅樣,然後直落搵個地方吹水吹到深夜,返到屋企唔需要報到之下大覺瞓。
 
第二日瞓到自然醒不在話下,然後開返你尋日買個隻Game,開始你瘋狂的打機旅程,記住,你時間唔多,所以記得叫外賣,唔好浪費時間落去食飯,最好叫麥麥送,因為邪惡嘅麥記平時你女朋友唔會俾你食!而第二日就係漫長嘅機海之中漫游,直到你頂唔順要瞓。
 
第三日,健康少少,鍾意行山而平時女朋友只會行鑽石山嘅你,可以感受下大自然,喜歡踢波打波嘅都可以,文靜少少你鍾意求其搵間Café睇吓書,又或者去舊區影吓相,扮吓文青亦得,但行程都係急,因為你可能一年先得一次機會,你要將一年嘅量清晒,係需要計劃的。
 
講講吓就三日,中六合彩嘅感覺,係好,但當你將筆錢洗晒,知道自己好快就會打回原形嘅感覺,就好唏噓。
 
當你去機場接女朋友機,嗰程機場巴士,係你最後嘅時光,建議你乜都唔好做,戴上耳機,播返首杜汶澤嘅《眼晴想旅行》。
 
收拾心情後,你見到一個熟悉嘅身影,上前幫佢推走行李,然後問:「BB你玩得開唔開心啊?」「開心啊!不過唔知幾時先可以再去旅行。」「傻豬,開心咪遲D再去囉。」
 
蔣薇
www.fb.com/maydreaming

COMMENT