2016/10/06

《男人的外在美》

2016_10_06_蔣薇MenClub Column
 
圖片來源:互聯網
 
由細到大學校都教你內在美嘅重要,我有個朋友,佢一直都無女性緣,成日自怨自嘆今時今日嘅女人個個都唔識欣賞內在美。OK,先唔講佢係真唔係有內在美,假設佢有先,無人叫你個賣相咁差喎。
 
學校係教,做人,唔可以單單有外在美,而無內在美。
 
睇清楚喇,係外在美唔夠,要內在美都有,從來無人話外在美唔重要。只不過今時今日如果你注重外表,就會俾人標籤係得個樣,大佬啊,唔俾人係文武雙全咩?
 
歐美民主國家選舉有個傳聞,通常外表比較好嘅候選人係會多人Buy,因為普遍人都會覺得,連自己個身型,個樣都未執得好,點治理國家啊?
 
推返去個人層面,連外表你都Keep得咁差,叫人點信你有內在美呢?
 
今時今日,男人係要Keep,係要執,係要打扮,唔係叫你去到化妝出街咁嚴重,但適當嘅護理係要嘅。
 
運動對男人係必須,肌肉唔一定要操,但唔好鬆,唔好肥,如果一個星期你都抽唔到時間去運動Keep Fit,三十歲嘅你應該慘不忍睹,你唔需要係健美人士,至少,你要俾人一個健康嘅感覺。
 
衣著都係,人型著乜都型,人柒著乜都柒,係真事,但柒都有分三六九品,你柒都可以柒得無咁嚴重,型都可以少少型,我唔計你係萬中無一嘅美男或醜男,大家都係中位線,型同柒可能只係一念之差,打扮可以幫到你。
 
最後就係樣,正所謂你的樣子如何,你的命運也必如何,樣唔一定要整容,只要有運動,塊面唔會特別肥,亦少好多毒素同油脂,只要每日洗洗臉,剃鬚同剪個頭,你唔係畢加索嘅作品,基本上都唔會出事。
 
五十歲人,張家輝都係就五十,你將佢拉埋公園吹水捉棋嘅阿叔,都係五十歲左右,有時我諗,點解人又五十,你又五十,會差咁遠,自己將來係張家輝,定係公園阿叔,真係一念之差。
 
用返張家輝嗰句,你依家無,但你將來會有,唔係賣金,睇返化骨龍時代嘅佢,同今日嘅佢,樣,係有得努力的!
 
最後我想講句,唔好再打飛機呃自己有內在美喇,根本內在美同外在兼有先係王道,今日開始,檢討吓自己,唔好再怨喇。
 
蔣薇
www.fb.com/maydreaming

COMMENT