2017/01/06

《紅白機係男人嘅洗禮》

2017_01_06_蔣薇MenClub Column 1
 
圖片來源:互聯網
 
得罪講句,無經歷過紅白機洗禮嘅男人,稱唔上係真男人!
 
最近出返嘅復刻版紅白機,好多人話重拾返童年回憶,我想修正少少個字眼,係再次跌入地獄、重拾惡夢……過咗咁多年,可怕嘅記憶早就淡忘,但當你再次打開隻Game先發覺原來自己什麼都不是……
 
我敢講當年整Game嘅人好大怨氣,點解?因為佢哋整出嚟嘅遊戲,唔可以算得上係娛樂,而係酷刑,今日大家會覺得Dark Soul係Boss,真男人先會玩嘅遊戲;但當你打開經典紅白機你先發現,原來當年隻隻都係Boss,望住部機,你同時打緊幾十個大佬!
 
好難怪老屎忽覺得後生仔一代不如一代,睇返今日嘅遊戲,嘩,真係當玩家係上帝,每一個設定都驚死你過唔到版,好似食神咁:「隻Game有咁簡單得咁簡單,有咁弱智得咁弱智,整好畫面同插畫,然後過唔到版就叫人課金,新關整堆新卡去專打,最緊要佢快啲爆到機然後買第二隻Game嘛,仲駛我教?」
 
無課金、無抽卡、無VIP、無外掛嘅紅白機,靠嘅只有上下左右同AB掣,大家用同一個角色、同一個版圖、同一個系統,過到你就過,過唔到就好冷酷無情咁出現「GAME OVER」字眼,你有幾耐無見過GAME OVER?因為今日好多遊戲都無GAME OVER概念,輸咗?唔駛灰心,再玩過,話埋比你聽點打,用時間去堆經驗又或者用錢買時間。
 
唯有紅白機時代先會有一次又一次嘅Continue同Game Over,用今日心態去玩,相信你唔到半個鐘就會爆機,係真係打爆部機!
 
無捷徑無秘技,訓練嘅係手指同反應,用一條又一條人命去堆砌出嘅技術。
 
有幾多人知道俄羅斯方塊都有爆機畫面,第一代Gameboy孖寶兄弟爆機之後出乜嘢?爆機畫面曾經好珍貴,令你永遠都記得。
 
今日嘅遊戲好多「成就」,不過對我嚟講,呢堆「成就」都只不過係廉價嘅豬肉獎,同當年爆機畫面比,差天共地。
 
蔣薇
www.fb.com/maydreaming

COMMENT