2017/01/13

《德州樸克看人生》

2017_01_12_menclub_maydreaming
 
圖片來源:互聯網
 
細個睇賭神玩Show Hand,心諗你賭神有幾神?咪就係睇吓邊個好運,技術?神?咪就係睇邊個有透視隱型眼鏡或者有特異功能識換牌,呢個唔係技術嘅世界,而係出術嘅世界。
 
直到最近有幾個兄弟都突然迷上德州樸克,仲成日叫人上去開局,我都有玩過一兩次,先發覺原來德州樸克真係幾好玩,我知實有好多道德魔人話唔好教壞人,所以呢篇文我會講從德州樸克之中吹水吹出嚟嘅人生道理。
 
1)手牌唔代表全部
 
同人生一樣,你揸住對A,對揸住一隻二同八,可以話係命運,手牌差唔代表你會輸,因為外面有五隻公海牌先係重點,一對A都可以輸俾三條二,你永遠唔會知道自己呢手好似垃圾嘅牌會唔會有奇遇,亦有好多人以為自己拎對A就ALL IN最後輸到仆街。
 
2)踏出第一步嘅勇氣
 
有好多人拎住爛牌就直接Fold,然後先見到出面撞到三條/四條繼而後悔,人生之中見到好多呢種人,做一件事你只可以預計勝率,但無百份百勝利嘅可能,投入幾多注碼係藝術,好多時你連盲注都唔落,少少都唔肯付出就想贏,只係浪費咗一次又一次嘅機會;好彩嘅係你侷住跟先發現自己副爛牌會發光發亮,所以話心動不如行動。
 

3)做人要識止蝕

 
好多人拎住靚牌,投放好多錢落一件事之後,唔甘心就咁摺埋,比人挑兩吓就All in埋,最後輸清光,有幾多人可以搞清楚Sunk Cost呢樣野,重要嘅唔係你付出幾多錢,而係你有冇機會贏。見過唔少人死守檔投放好多錢同時間嘅生意,最後輸得仲多。
 
4)靚牌幫你贏,技術幫你贏更多
 
新手會覺得運氣係最重要因素,老手只會覺得係水魚,比你舖舖都拎AA,你係贏,但人哋都可以Fold,你贏得幾多?比起賭神式Showhand唔同之處係,你真係有技術,幾時加注,點估人哋勝算,點睇穿人哋偷雞,呢種係技術,高手可以用一手好牌贏最多嘅錢,而低手只能贏,兩者分別幾大你都好清楚。
 
難怪德州樸克會令人沉迷,幾個朋友談笑風生之餘爾虞我詐,講技術又講運氣,再睇返賭神系列,真係得啖笑。最後戴多次頭盔,小賭怡情。
 
蔣薇
www.fb.com/maydreaming

COMMENT