2017/01/20

《在Facebook摑了自己一巴》

2017_01_19_蔣薇MenClub Column_
圖片來源:互聯網
 
唔經唔覺都用咗Facebook十年有多,之前推出咗個當年今日嘅回顧,當你有一日起身拎部電話碌吓Facebook時,會不經意見到一年前、三年前、甚至十年前嘅自己,除咗當年自己仲後生、仲未發福之外,你仲會發現自己原來曾經係咁。
 
人會變,你會唔會?通常自己都唔多覺,有好耐無見嘅朋友同你講你變咗好多,你會不以為意,因為唔熟嘅人只係睇你外表,好表面嘅改變;而同你熟嘅人又成日見,潛移默化慢慢適應你嘅改變。
 
最可以睇到你有冇變嘅,就係你自己。
 
如果你將自己Facebook拉到最底開始睇返,你會意想不到原來自己十年前玩緊呢隻Game,周末消遣原來係咁,對時事政治睇法係點,再對比返你今日,你先發覺自己改變咗幾多。
 
最了解自己始終係自己,有啲人有寫日記習慣,但可能佔比較少數,一般而言,寫日記其實比起寫Facebook寫得更多更詳盡,好多細節都睇到,只不過唔係咁多人有恆心去寫。Facebook就簡單得多,你不知不覺就會Update,然後好多年之後又會突然跳出嚟話你知。
 
我好鍾意寫信俾自己,將佢收埋係Email/秘密文件夾,N年之後唔覺意睇返,真係別有一番風味,我好記得開頭我係寫:點啊?N年後嘅我?你過得開心快樂嗎?今日嘅我打算做乜乜乜,唔知N年後有冇做到,成功定失敗,後悔做咗定後悔無做。
 
再望望今日自己,原來當年咁Green,今日我哋講後輩點發夢,原來曾經自己咪一樣樣,分別在於,你個夢已經醒咗,時間亦都過咗去,而後生嘅仲有機會發落去。你?已成定局。
 
我成日諗,如果今日嘅我可以俾意見當年嘅自己,我會講乜?
 
可能我會講,做人現實少少,唔好發咁多夢,踏實啲,然後結婚買樓。
 
我再諗,其實當年我父母都講過啦,係我自己唔聽姐,原來不知不覺,我已經變咗當年囉嗦嘅父母。
 
蔣薇
www.fb.com/maydreaming

COMMENT