2017/01/27

《新年點可以無周星馳》

2017_01_27_蔣薇MenClub Column_新年點可以無周星馳
 
網上資料圖片
 
周星馳喺男人心目中係好特別嘅存在,而新年更加唔可以無周星馳。
 
功夫之後佢就退居幕後,每年都總有一套賀歲片,永遠都見到滿頭白髮嘅星爺大力宣傳,可惜電影之中再搵唔到佢身影,就算新演員幾有演技都好,都取代唔到佢嗰種笑嘅時候你喊、喊嘅時候你笑嘅感覺。
 
新年總會重播又重播周星馳嘅戲,由家有喜事到逃學威龍,又或者賭俠賭聖,拜緊年時睇到周星馳你可以暫時忘卻親戚無聊問候,再一次重睇一套已經數唔清睇過幾多次嘅笑片。
 
我有朋友佢出口成文,應該話星爺嘅對白佢有九成都可以一字不漏地用佢語氣讀出嚟,女人會覺得好無聊,但兄弟們一聽就知有沒有,大佬啊你唔好咁痴線啦。
 
今時今日嘅賀歲片,充斥住賭城風雲、I love HK、八星報喜2016版、賭乜賭物之流,求其搵幾個大卡士大堆頭制作一個夾硬迫你笑嘅無聊劇本,連基本起承轉合都無,女星更恐怖,隨時搵幾個大陸女演員賣身材就算,比起以前女神級數嘅朱茵、張敏無可比性。
 
不過大時大節乜都無開,拜年期間搵套戲攝時間你只好硬住頭皮入場,得來嘅只係一次又一次中伏。
 
究竟係人大咗我唔再識笑?
定係學黃子華話香港人已經笑唔出?
亦或係無咗周星馳嘅香港已經拍唔出媲美當年嘅笑片?
 
當你重睇第N次嘅時候,你知道佢下一句會講乜,同一個Gag已經再笑唔出,反而你會睇得到更多野,星爺佢無拎過咩獎,但其實佢做戲浮誇之中充滿細緻,好多細位你可以親身感受當時佢嘅情感,演活咗一個角色甚至令你覺得係真實。好似佢喜劇之王入面嘅落寞、食神入面嘅看化、大話西遊入面嘅情真,笑點以外你認真望住佢嘅面容,原來佢一直都好似苦笑咁。
 
傳聞話星爺佢唔喜歡演笑片,甚至真人係好鬱鬱寡歡,以前我聽唔明,但依家我明,原來搵一個唔開心嘅人拍笑片先係最好笑,比起快樂,我哋更喜歡看別人痛苦。
 
蔣薇
www.fb.com/maydreaming

COMMENT