2017/02/24

《懂得打逆風才是真男人》

2017_02_24_蔣薇 MenClub Column
 
網上資料圖片
 
順風、逆風,如果有打開機嘅朋友都唔應該陌生。
 
話說我最近發覺有隻Apps,可以話係手機版嘅LOL,我唔知你有冇打過LOL,但呢樣嘢唔係重點,今次我講嘅你未玩過都可以睇得明。
 
裡面有個Terms叫順逆風,順風局即係你有優勢,可以㩒住人哋打;而逆風局即係相反,你處於劣勢俾人㩒住。遊戲係五打五真人對戰,公平性強,就算俾錢都唔會屈到太多機,開局如果你死咗幾隻,就會被拉開戰力,亦可以話係強者愈強,富者愈富嘅概念。
 
我遇過唔少情況,當你處於劣勢時,好多人會選擇放棄,甚至投降,而我就算咩情況都好,都會打到最後一秒絕不放棄。
 
對機有人為娛樂,最好就係強姦人,對面大叫唔好,而你就霸王硬上,試吓易地而處,你被人㩒住砌,你點叫唔好都無用,你又會唔會開心?如果你求開心,咁咪Quit Game再開囉。
 
其實做人同打機一樣,不過做人你無可能隨便Quit Game,斬掉重練,絕大部份人都唔係含住金鎖匙出世,打嘅都係逆風,而你有返咁上下社會歷練,你就會習慣打逆風。
 
順風順水你唔會超越你嘅能力,裝備勁過人,經驗勁過人,你斬人一吓等於人哋斬你兩下,容錯率就高,當你點打都贏,好少人會再去尋求點打得再有效率;反而逆風之下,你被迫計算得更多,你點行、點斬都要比人哋做得更好先有機會反勝,男人就喺逆風之下被迫進步。
 
睇咁多漫畫、小說、電影都好,公式都係主角劣勢再反勝,可能我由細到大都係被呢種思想所感染,面對逆境,我唔係諗:唉,又輸,快啲棄完開局新;而係:如果呢局我輸咁多都贏到對面,佢哋一定輸到生蝦咁跳,咁就爽喇!
 
不過今時今日,好似愈來愈少人識打逆風,社會提倡贏在起跑線,成功靠父幹,優勢係重要啊,但請你記得,命無得你揀,但路有得你揀,你講得再多起跑線同父幹都好,都改唔到啊!去追求無可能嘅野,只有弱智先會,倒不如掌握現在,諗吓點逆境反勝。
 
當你打慣逆境波,好可能你會愛上逆境之中的緊張感,甚至覺得順境波好無聊。就算四個隊友都表態投降都好,我都會毫不猶豫咁表示我唔會投降。
 
蔣薇
www.fb.com/maydreaming

COMMENT