2017/03/03

《打機可以發達?》

2017_03_03_蔣薇 MenClub Column photo
 
網上資料圖片
 
知唔知電競世界賽冠軍獎金可以有幾誇張,以百萬美金起計,上網直播打機都可以搵到幾萬月薪,好多小朋友都大大聲教訓老豆老母,打機都可以有前途,少不免受吓藤條折磨。
 
新年上咗個朋友屋企拜年,佢有個細佬今年15歲,正值反叛期,拜年都可以完全唔蒲頭,利是都要拎入房俾佢,好似進貢咁款,仲要眼尾都唔望咁講句多謝就算,咁朋友老母就當然鬧佢啦,正宗阿媽式嘅:打機搵到食咩?細佬當然駁嘴話搵得多過你啦。
 
機,我都打過,仲睇唔少比賽,但我觀察完細佬一輪之後,忍唔住幫佢教吓仔。
 
「細佬,你話打機搵到食,唔知你依家打到咩排位呢?我頭先睇你好似都仲係黃金喎,世界大賽搵到錢我知,職業選手搵到錢我都知,但你咁嘅技術咁嘅排位,好似唔多關你事囉。」
 
15歲應該都係中二病嘅發病期,聽到我講中佢得黃金呢個痛處,佢當然駁返我:「今日我係黃金,我只要一直打就可以升級,唔練點會進步啊?」
 
「咁我又想問吓你平時點練呢?頭先我見你打,都真係麻麻地,仲又叫又嘈,我唔知你有冇隊友啦?你應該知你打比賽係一隊隊參加,你搵到五個隊友未?」
 
「有啦,成班同學一齊玩有十幾日,我哋成日都一齊組隊打。」
 
「好,我當你有決心,咁你同學又有冇?你肯定佢哋真係你隊友?佢哋唔會當娛樂玩玩吓?你肯付出時間去打,隊友會唔會?今日大家一齊讀書就可以打吓,你升一級轉咗班,佢哋可能就同第二班人打,到大家畢業升學工作又會唔會咁神心同你打?
 
仲有喎,頭先我見你打咗幾場,有贏有輸,贏你就高興,輸你就發脾氣,我無見過你睇返Reply睇吓自己打成點,更唔覺得你有戰術。要做冠軍,要打比賽,已經唔係打機,打機係娛樂,你可以好求其,但電競世界玩家有成千萬成億人,你點喺咁多人入面脫穎而出?唔係叫吓鬧吓就得,同你平時返學一樣,一條數你第一次做唔識,就不停做,做到識為止,考試嗰陣你要貼題,你要估考咩,你有幾多戰術?逆風點打?3打5要點走?你一隻英雄唔小心俾對面剋死又要點處理,你有冇系統去打先?
 
好老實講,電競搵唔搵到錢,你點駁你阿媽我覺得錯唔晒,但以你目前咁嘅心態,仲未係一個比賽選手,只不過係搵一個藉口去支撐你打機娛樂,電競世界根本就比你面對嘅考試、職場更可怕,你唔係打一個人,而係一隊人;你面對嘅唔係香港人,而係全世界唔同層面嘅人,你有冇信心去挑戰世界?你有幾大投放同付出?大家心照。
 
係人都知頂尖運動員搵到錢,C朗一個月搵得好多又點?你做唔做到C朗?C朗付出嘅你又付唔付出到?」
 
細佬當然還唔到拖,因為佢同好多小朋友一樣,諗同做仲未一致,我唔睇少人打機,但我睇少唔認清局面,只係識講大話嘅人。坦白講,打機難過讀書,就算你上網拍片打機都好,你每日可唔可以準時上線?達哥日日開台,你估易?
 
做人唔好只睇成果,唔睇付出,夢想呢樣嘢,人哋信唔信,好睇你做緊咩。
 
打機可以發達?我認同啊,贈返你一句,買六合彩都可以發達,六合彩可以碰運氣,打機唔得囉。
 
蔣薇
www.fb.com/maydreaming

COMMENT