2017/03/10

《打機與Team Building》

好多大公司都會有Team Building,請埋一堆人生教練去幾日Camp,又叫又跳上山下海,最後齊齊叫聲口號完結。十個上完十個都覺得廢,講真,班同事日日見,平時都做唔到Team,去幾日Camp又做到乜?

計我話,打機做Team building有效率得多,話說有一間細IT公司,做得IT都係陽剛味重,個老闆又同佢哋痴,老闆佢有另一個朋友都有間公司,而大家都打緊一隻5 vs 5嘅Game,咁就相約紫禁之巔生死對決。贏輸事少,老闆面皮是大,所以老闆佢拎咗成皮嘢出嚟同班手足講,如果你哋上到A,咁就可以拎走呢批獎金。

成班同事無拖拍,收工一齊OT練機,半個月就拎到筆獎金,仲贏埋對面公司,皆大歡喜,老闆發覺班同事有少少唔同咗,比以前有Team work有士氣,我就分析咗以下幾點:

1) 隊伍分工清晰。遊戲入面有唔同角色定位,例如坦、射手、輸出、戰士、輔助、刺客,一開始成班同事都鬥心重,個個都想做殺人個位,曾經試過全部出射手同法師打,當然就係悲劇啦。後期大家終於知道自己定位,重要意識到原來唔太起眼嘅崗位作用係咁大,如果無咗坦或輔助,你一個打十個都無用。

2) 辦公室入面成日都會聽到班人大叫:「快少少清理兵線!」意思係搞掂你手上嘅事然後過嚟幫手,遊戲中好重要嘅係清兵,當你清得快過人,你就有多少少時間去幫自己友手,更大機會殺到對面製造優勢。相反,自己嘢都做唔好,要同事幫手執手尾,已經係輸局嘅開始。

3) 士氣嘅重要性,一隊人有咩氛圍,就有咩結局,起初佢哋成日互插,大數對方不是,但逆境之中,一句鼓勵說話比一句辱罵來得有用,有時自己做錯嘢,邊個唔知衰,聽到一句屌,你都要受;聽到一句安慰,你會更有動力去做得更好。有一次佢哋羸咗之後,有人講咗句:好彩係同你哋夾咋,唔係唔會有個默契打到呢一波。就係咁,佢哋因為呢句而改變好多。

4) 溝通嘅重要性,一開始佢哋打機好靜唔會出聲,但後期大家都不斷叫不斷講,因為就算夾咗幾多次都好,人都好難完全理解自己想法,而唯一方法就係將自己行動同計劃講出嚟,咁大家先可以配合到。其後佢哋工作速度上升好多,因為大家有乜都會講,變相少好多誤會,互補都易。

一隊人應該係從戰鬥中大家磨合而成,而唔係強行打磨到大家可以拍埋一齊,敢用打機去Team Build,好唔真實,亦好悲慘,證明你條Team無女同事啦頂!

蔣薇
www.fb.com/maydreaming

COMMENT