2017/03/17

用心對待事業的男人

2017_03_17_May Menclub
 
網上資料圖片
 
正所謂樹大有枯枝,族大有乞兒,講起的士佬,你會諗起咩?拒載?唔識路?唔過海?短屌長鬧?十個有九個都對的士佬只有壞觀感,想享受,想做返個乘客,大家都會選擇Uber。
 
有日我同個朋友剛剛聲討完的士佬惡行之後,好死唔死我又要搭的士,點知……俾我遇到一個乞兒之中嘅清泉,一個非主流的士佬。
 
外表係一架普通的士,但一坐入去,我呆咗,真係呆咗,第一眼睇到嘅,係佢坐位加咗背墊,好Sharp嘅美國隊長背墊;第二眼坐底,前座之間有一個層架,上面寫住「免費手機充電」,搭的士可以充電,聊勝於無,但份心意真係不得了。
 
我搭短程三十蚊,但呢程旅途我不斷去觀賞呢部的士,去發掘的士佬嘅情趣。層架上面仲有一包包裝紙巾,似係俾你隨便用/拎;我前方有個掛曆話你知今日幾月幾號,另一邊椅背就厲害,掛住個小型垃圾筒,一支瓶裝水,一包濕紙巾,仲有一盒盒裝紙,嘔吐袋,下面仲有幾本雜誌俾你睇,兩邊窗仲有掛簾俾你遮太陽。
 
三十蚊車錢,我俾多咗十蚊Tips佢,落車一刻我仲難以忘記呢一程車,我發現原來做好一件事,做好自己職業係可以俾你想像之中做得更多,平時的士佬上車打招呼,好聲好氣,識路又快,落車找錢仲講多謝,大家就覺得心滿意足,但原來可以做嘅遠比想像多。
 
當一個人好用心去做好自己份工,超越份工需要嘅嘢,旁眼人睇得好清楚,真係會欣賞你,甚至付出更多去支付呢份心意。
 
究竟佢對呢份工有幾重視?從佢架車睇得出,自發行為做到如此貼心,比起大集團餐廳機械式嘅歡迎光臨多添一份人情味,如果每架的士必定有呢一套嘢,你唔會覺得驚訝。好多人打份工,就只想做份內事,衰少少嘅會覺得做得越少越著數,但有種人,佢會比正常人做更多,你會覺得佢多餘,但佢會流露出一種令人欣賞嘅味道。
 
呢種味,叫認真男人的味道。
 
你會欣賞一個做十二成力,只得十分收獲的人;但你永遠唔會欣賞一個出七成力,但想有十分收獲的人。
 
成日都話的士佬唔好,我深信,如果的士行業肯向呢部車學習,仲邊駛驚Uber?
 
想生存,唔應該害怕挑戰,係男人就堂堂正正擊敗對手!
 
蔣薇
www.fb.com/maydreaming
 

COMMENT