2017/03/24

《今天的我,是沒有極限的》

2017_03_23_蔣薇MenClub COlumn
網上資料圖片
 
上一篇講的士司機嘅文,我講咗一句:
 
「你會欣賞一個做十二成力,只得十分收穫嘅人;但你永遠唔會欣賞一個出七成力,但想有十分收獲嘅人。」
 
然後有讀者留言話:「出七分力有十分成果的才是叻人」No Offense,今次想拎呢一個七分力同十分成果做題材,再講多少少我心目中嘅男人哲學。
 
十分成果,坦白講句,其實現實世界入面唔難,因為有唔少工作都係收一個固定收入,的士佬按錶收費,你點去到目的地,中途受唔受到應有嘅禮貌、服務、車廂清潔等等都不受保障。
 
如果你係當事人,出七分力就有十成收獲,當然開心,但你有冇諗過,你出嘅七分力,又係唔係真係做得足你應盡嘅本份?
 
我覺得男人有分四個層次,隨年齡會有所改變:
 
第一層,盡力去做到十分嘅成果,年輕男人能力未完善,呢個係學習階段,求學時期你需要付出更多時間去做一件事,好似剛剛入職咁,你要做一個Task,花嘅時間會比熟手同事慢,你要做到對方一樣水平,就需要出十二分,十五分力。
 
第二層,你已經係上述熟練嘅同事,有一個應有水平去處理事務,出十分力,可以得到十分回報。呢個層次已經唔再係學習,而係持續去應用,主要係維持應有嘅效率同續航性。
 
第三層,大師級嘅朋友,你對事物已經有所了然,七分力做到十分成果,甚至五分都可以,呢個效率令你可以擁有更多時間,好多事業有成嘅男人,佢哋都會比其他人得閒,因為做同一樣嘢佢哋花好少時間,搵到自己長處發揮。
 
第四層,有冇諗過當你成為大師之後會點?多咗時間又會做乜?有日你會發現自己太得閒,你會開始問自己,我做七成力已經有十分成果,咁如果十成力會點?而我上文指嘅司機,就係一個盡緊十分力去挑戰極限嘅人。
 
好老實講句,佢做多過十成,都只係按錶收費,得到十分成果,種瓜得瓜,種果得果係好實際,但人生之中,你做嘢有時唔係在乎個十分成果,特別係你去到某個階段,你會開始享受付出十分力而收獲到超越十分嘅收獲。
 
我相信每一個人坐上呢部的士,都會心生驚訝、好奇、讚賞,呢幾樣嘢唔會出現係車資上面,但係比金錢更珍貴,可能佢要嘅,就係呢種無形資產,你用七分力去完成十分事,都只係盡本份,唔會享受到超越本份嘅感覺。
 
另外,七分力得到十分成果,係叻,但亦等於你限制自己嘅成果,成熟男人目標又點會止十分成果?有冇諗過你值得更多?
 
與其諗自己可以用幾多分力去得到十分成果?
 
不如諗自己用十分力可以得到幾多成果,好似Men Club Slogan,Be A Better MAN。
 
「今天的我,是沒有極限的」。
 
蔣薇
www.fb.com/maydreaming
 

COMMENT