2017/03/31

《AA制的男人》

2017_03_31_蔣薇MenCLub Column
網上資料圖片
 
男女朋友之間,應否AA制,呢個話題真係講到臭,當講平權時,女人總會千方百計去要求有相同待遇,但一涉及自身利益,佢哋又放唔低,公佢贏字你輸呢種玩法,相信各位男人都習慣咗 。
 
早兩日BE有個Post講月入六萬嘅男人同月入萬尾嘅女朋友去旅行AA制,BE同MC兩邊真係好似兩個世界咁,今次就同大家從另一角度分析件事。
 
一個月入萬尾嘅人,去旅行都覺得有好大壓力,洗多嘅錢要分期還,唔提男女的話,其實大家都會覺得咁不如唔好去啦。之不過套上一個女性,加上一個搵得多嘅男友,件事就會有爭議之處。
 
可能我係比較守舊,男士風度之下,出街食飯俾多少少,其實無乜大不了,但如果你伴侶喺洗費上面超出佢哋本身承擔能力,然後要男方找數,咁就係一個問題。
 
男女之間,總係男人付出更多,結婚上、供樓上、生活洗費上,過時過節都好,男人好似被冠上一種責任,唔少男人會買個過萬嘅手袋、幾千但著幾次嘅鞋、得閒先戴嘅飾物俾女伴,但自己就用幾舊水嘅袋、鞋,仲一年都唔知換唔換到一次,連買部遊戲機都要左計右計,好似儲多少少錢好,唔捨得去洗,都唔講好多男人因為女朋友而放棄多年嗜好,賣咗幾多收藏品等。
 
被寵愛的一方一直要咩有咩,人就係咁,當你唔需要付出時,就唔會計算,件嘢有冇用,值唔值,已經唔需要考慮,經濟學點,Goods嘅Value大於零,而代價係零時,有總好過無。相信唔少男士都會耐唔耐發現之前女伴買咗嘅嘢無用過,唔知去咗邊,我哋會開始反思,點解自己買嘢諗過度過,反而對方就可以浪費。
 
返回原點,一個成年人需要為自己消費負責絕對合理,記住,錢洗喺你身上,享受亦係你身上,點解要人為你付賬?
 
第一,你要先清楚自己有冇能力去享受,無嘅就算你男友搵幾多都好,都唔好諗住將自己責任轉嫁到伴侶身上,如果愛係責任轉移,請你再反思自己嘅愛情觀。
 
第二,有時候伴侶願意洗錢喺你身上,係愛嘅表現,但請記住一個原則,愛並唔係Ask For,即係你主動提出的愛並唔係愛,而係欲;男友主動去做一件事,同被你命令去做一件事,係兩回事。
 
AA制,係能力問題,係責任問題,如果你為AA制負責能力都無,請重新審視你有冇資格去享受。你有能力時,有人願意為你埋單,係浪漫;你無能力,要人為你埋單,係傲慢。
 
蔣薇
www.fb.com/maydreaming
 

COMMENT