2017/04/07

《有能力的話就係你揀老闆》

2017_04_07_蔣薇MenClub photo
網上資料圖片
 
唔少人都受過HR 留難,更有百分之九十以上打工仔覺得HR係最令人討厭崗位,求職,就好似求人俾個機會你咁,事實上,有能力嘅人永遠都係揀老闆,揀公司做。
 
早排特首選舉幾乎成為全城熱話,你問我睇好邊個,我會答你我又無份選,講嚟晒氣,中環人市儈兼現實,佢哋會計算邊個做會對股價有咩影響,再諗勝算,同普羅大眾講民主,講形象分歧好大,但最近有一個問題,令大家好有討論空間。
 
薯片同林鄭,你想跟邊個老闆?
 
選舉論壇入面,林鄭公開點名地想挖角薯片助理,點知第二日薯片助理就走出嚟拍咗條片宣傳,公關計,薯片真係贏到開巷,但邊個贏到,都係未知之數。
 
講返正題,兩個老闆,兩條Team,大家都有偉論。
 
「計我話就揀個贏嘅,如果你公司成為獨市,到時你慌唔會發到豬頭咁,跟邊個老闆係其次,邊個帶到我搵食先係重點!」
 
「我就唔係咁睇,打份工除咗錢之外,成就感都好重要,如果我老闆肯聽我講,成條Team可以做到成績出嚟,做到口碑,咁你都會覺得無浪費到自己,兩隊人出品大家都有目共睹,職場好細,如果俾人知你之前做過咁多柒嘢,將來你都唔會好過。」
 
「我份人就好簡單嘅,明顯一條隊做又三十六,唔做又三十六,你可以hea住做,得閒到震,公司又唔係靠我開飯,好似國企咁,日日朝九晚六等收錢,何樂而不為呢?」
 
「做白武士都幾好啊,如果一間公司依靠我嘅能力可以起死回生,扭轉局勢的話,你都唔好話唔爽,做人咪咁Hea啦,Hea就即係浪費人生,你要相信自己可以做更多嘛。」
 
「是但一面都好啦,到時我有內幕消息,轉幾手出去股票市場搵一大筆,錢我就唔憂啦!」
 
「兩邊人,我見到一個情況係,有一邊好主動話人聽我同呢間公司打工,另一面個個都唔敢講自己打緊呢份工,如果一間公司你連係佢員工都唔敢承認,做嚟做乜呢?」
 
至於我?我會揀個我自己都Buy嘅老闆,如果你同過廢柴上司共事,你就會知道幾多錢都補唔返你俾老闆玩死、激死嘅生命。
 
蔣薇
www.fb.com/maydreaming
 

COMMENT