2017/05/26

《丟丟丟,丟你》

2017_05_26_maydream menclub photo
 
網上資料圖片
 
一年總有一兩次屎忽痕,又或者迫於無奈要執屋,唔係將嘢放到整整齊齊嗰種,而係大執,要丟唔少嘢。
 
香港地寸金尺土,你想放嘢喺屋都係一件奢侈嘅事,有時睇外國嘅Blog,見到有鬼仔佢哋將自己由細到大嘅收藏一次過展出,再諗吓自己,其實一路以來,有好多嘢你都被迫丟棄,人哋七老八十時拎出嚟同個孫講,呢件玩具係當年最興嘅,呢隻Game我以前成日玩都唔得,只可以喺Facebook偶爾嘅懷舊Post入面搵返呢種情懷。
 
唔似外國咁,佢哋有地庫,有閣樓,香港要向高空發展,連你間屋都係,牆上面鑽幾個層板放你收藏都只係九牛一毛。
 
細個你阿媽叫你丟嘢,大個你女朋友迫你丟嘢,再之後你個仔個女要住要生活,你更要讓出僅有空間俾佢哋,到你四五十歲時,你望望自己仲有乜嘢喺身邊?好似唔多,或者呢種過程係成長一部份。
 
執得愈多次,你就愈捨得丟,舉個例,有一張相對你嚟講好重要,當你第一年執時唔捨得,到你第十年執時,見第十次,你就會問自己,係唔係真係要留?
 
唔知係睇化咗,定係忘記咗,隨時月變化,重要嘢會變成無咁重要,再變成唔重要。
 
以前嘅班衫,簽晒咁多人嘅名,有幾多仲有聯絡;
前度嘅公仔,曾經每日放床頭,仲留嚟做乜;
過氣嘅遊戲,爆完機出埋下集,已經唔會再玩;
睇完嘅漫畫,以前重睇無數次,今日已經只係裝飾。
 
今日你問我,有乜係唔可以丟?我會搞Gag咁講句,唔好丟老母就得。
 
成年人世界中,隨住你執屋,童年會慢慢忘記,有好多時,你丟嘅嘢好似變得唔再重要,事實係,你覺得唔重要時,你已經失去咗樣好重要嘅嘢。
 
喺香港,無錢的話,係會連你嘅回憶都被慢慢蠶食。
 
丟嘢,唔係單單丟去一樣嘢,仲係無形之中丟咗「你」。
 
蔣薇
www.fb.com/maydreaming
 

COMMENT