2017/06/02

《暖男與兵》

2017_06_02_蔣薇MenClub Column
 
網上資料圖片
 
繼外星人、軍人之後,女性圈最新興起暖男風,咩係暖男?你問女人們,佢哋會答你,無微不至、溫柔體貼、善解人意,但永遠無人會講出一個Point,睇落四四正正甚至靚靚仔仔。
 
說白點,你靚仔,咪暖男囉;你樣衰,就叫癡漢喇。
 
暖男風吹起,又為男人帶來新一輪災難,就好似阿媽咁,佢哋永遠覺得師奶朋友個仔又聰明又乖,女人們會話,你學吓人啦,你睇吓人哋幾識氹女仔,然後就一系列數落,講真,都幾不是味兒。
 
諗返起學生時代,有幾多朋友為咗追女仔,無所不用其極,又接返放學,我聽過最癲係,返8點,男仔6點出門,坐一個鐘車去女仔屋企接佢,再一齊坐車返學校,放學如是,仲要唔係一日,係長期咁做。亦有人摺星星摺咗幾樽,學結他又彈又唱,可惜……追到嘅機率甚低。
 
你追到,咪叫暖男囉,追唔到,就係兵喇。
 
有個追女大師講過一句至理名言,女人唔會因為你對佢好,而喜歡你,愛你。
 
咁大師,女人點先會喜歡你,愛你啊?佢答,就好似《國產漆漆柒》咁,漆黑中嘅螢火蟲一樣,叫雞都唔駛俾錢,因為,你係幾咁鮮明,幾咁出眾。
 
暖男呢個概念,係唔實在的,你靚仔又出色已經夠殺,再加埋你對佢好好,我舉個例,有個女仔又靚又好身材嘅,你已經暈暈地仆埋佢,再加埋佢對你就好似主僕關係咁,係唔係好似曾相識呢?咪就係AV情節囉。
 
同《來自星星的你》《太陽的後裔》一樣,暖男只係另一套女人睇嘅愛情動作片。
 
當你想男友做到暖男嘅幻想時,男友們想你做到女優嘅一百零八式又得唔得?
 
我知個例子太露骨,一陣又俾人鬧,舉返個正經例子。
 
當你話自己個仔唔及人哋個仔讀書咁叻咁乖時,不如先問吓人哋點教仔,同埋點養仔先啦。
 
講返正題,點為之暖男,點為之兵?
 
有來有往嘅咪暖男囉,有來無往嘅,咪兵囉。你想要暖男?Sorry,其實你係想要兵咋!
 
蔣薇
www.fb.com/maydreaming
 

COMMENT