2017/06/09

《課金之女》

2017_06_09_maydream menclub

網上資料圖片

近排俾女友迫我陪佢玩一隻手遊,名就唔開喇,都幾多女仔玩嘅,模式都係好直接,無乜技術可言,衝數據、抽嘢、種田、買裝備、VIP制度之類。

有日我無意中睇到,佢嘅VIP已經去到8,意味住乜?佢課金,仲課唔少,計埋計埋,已經係一部Switch嘅價錢,我當堂嚇一跳,然後苦笑。

你估唔到,女仔打機課起金上嚟,可以狼過男人N倍。

男人打機,唔去到山窮水盡,走投無路都唔會課金,係佢哋身上面拎8蚊,難到登天。愈難玩,我哋愈唔想課金,網上面有無數《零課攻略》《抽嘢分析》之類,我哋務求用免費方法去做到一件事。

因為我哋打機,唔單止係娛樂,仲係一種挑戰,如果一隻Game課完就會好易玩,有意義咩?可能我哋成長於單機地獄之中,以前無課金,你要通關就只有睇攻略。

打街機,你一蚊爆機叫型,你無限金錢爆機,就係柒!

通關的意義,從呢種模式之中根深蒂固,到今時今日呢種唔課金打唔到機嘅世代,我哋都仲有呢種執念,好聽叫有堅持、叫念舊;唔好聽叫攞苦嚟身,叫犯賤。

曾經我哋不齒一種通關模式,叫金手指,今日佢換咗個Terms叫課金,仲係遊戲商一種正當不過嘅行為。

望住平時唔多打機嘅女朋友,係課金之下拉開我嘅距離,呢個距離,用技術同時間係拉唔近,而當我拉得近之時,亦即係佢將近棄Game之時……

以前我好希望有個會同我一齊打機嘅女朋友,我估中咗個開頭,估唔中個結尾,估唔到我同佢玩嘅Game係玩課金,更估唔到佢竟然會重課。

當我如常咁打開我平時玩嘅Game,我諗起新年期間因為有利是錢而一時放鬆而買嘅新角,係幾咁廉價……原來一直以來嘅堅持,係幾咁傻豬……

我再望唔透呢個世界,仲有咩我可以掌握,我嘅執著又有乜價值……我含住淚咁,將手指放著電話Home鍵中,課咗一隻想買好耐嘅蝙蝠俠。

當我用蝙蝠俠嘅時候,諗起The Flash問過佢一句:「你有咩異能?」

蝙蝠俠答:「我有錢!」

蔣薇
www.fb.com/maydreaming

COMMENT