2017/06/16

《如果金庸群俠傳今日面世》

金庸群俠傳_遊戲選單_遊戲螢幕截圖 (1)
 
網上資料圖片
 
一幕華麗而毫無內容嘅3D動畫過後,你會正式進入遊戲,有幾個職業俾你選擇,但其實去到尾都係一樣,你揀乜都唔會影響到乜嘢,軟體娃娃彈出,唔再係一隻卡通人物,而係一個蘿莉/童顏巨乳/御姐設定。
 
教學正式開始,佢會教你行前行後開寶箱,你跟住佢一個一個Step咁做,就會升Lv,當你走出主角居時,已經喺教學中變成10Lv。右上角突然彈出一個叫「自動」嘅掣俾你,第一個主線任務係去客棧搵店小二,邊間客棧?邊個店小二?你唔需要理,因為自動幫你行埋,你要做嘅就係行到店小二度,再揀多次自動任務,然後佢又會俾錢同俾經驗你,升到十一級,佢會話你知有個叫南賢嘅人,去搵佢就得,再自動。
 
行嘅路唔會好遠,因為怕你嫌悶,去到南賢度,拎錢拎經驗,跟住做乜?你已經唔知,因為你已經開始無視個劇情,反正你唔睇,都有自動幫你搞。去福威鏢局打林平之,自動戰鬥,由於怕你一開波就死會棄Game,所以你三兩下手腳就KO佢。
 
打完林平之已經係十五Lv,係時候同你介紹副本喇,你每日可以單挑林平之一次,個名變咗「精英林平之」,連自宮林平之都懶得去改,全部叫精英就算,打佢一鑊你有機會拎到辟邪劍譜殘頁,集齊五頁就可以修練,不過頭四頁好易打,第五頁就好難打,再介紹個奪寶系統比你,你可以PVP咁打人拎殘頁,每日打三次,想再打多幾獲?無問題。咁就要講到VIP系統喇,你充值到N元之後,就會成為VIP,每日可以用元寶購買PVP次數,副本次數,令你更快可以打到寶物。
 
自動去聖堂,搵到孔八拉,佢會教你用暗器,同埋你拎到第一件裝備「皮衣」,開啟裝備系統,皮衣可以升級,搵素材,一星皮衣升到十等可以升兩星,升到六星可以進化「+」最多+999,點升?俾錢囉。
 
自動到差唔多,你終於面對一個強大對手,叫田伯光,嘗到第一次敗績,玻璃心嘅你好失落,系統都好照顧你,面對強大敵人,同伴好重要,「召喚」登場!
 
S級張無忌,S級令狐沖,S級胡斐,S級小龍女,S級黃蓉,最近推緊呢五個英雄,家陣賣大包俾你免費抽,一抽!屌,抽到個C級尹志平!不過唔緊要,你事前登錄咗,再綁定Facebook,同埋你睇幾條廣告之後,你終於十抽到,必出A級大俠!
 
十抽之中,你終於抽到S級楊過,A級岳不群,B級岳靈珊……咦,原來岳家幾位一齊出有加乘喎,仲有專屬武功同武器,意味住你又要衝武功武器等級。
 
你戰鬥力自己去到18000,打唔贏19000嘅白萬劍,卡關了,你被迫要專心練功,用體力去掃蕩,即係乜?一键打二十場嗰種,係VIP3嘅權限啊!一分鐘你課咗30蚊就升到20000戰鬥力,完勝了白萬劍!點解要打佢?打完佢又點?你都唔記得,因為你都無睇劇情!
 
30Lv,開啟了PVP競技場,你一入去先發現原來仲有SSR級王重陽,掃地僧同埋獨孤求敗,同級都高你二萬戰力!仲拎埋倚天劍,屠龍刀。
 
唔緊要,上網睇攻略你知道原來野球拳十級超勁,你用咗一晚自動掛機,第二朝你已經十級了,再去打PVP,人人都是十級了……
 
40Lv開公會,每日要簽到;45Lv開通天塔,第一層華山弟子我個楊過都打唔贏;50Lv開寵物,騎龍騎鳳;55Lv開種田,每日種到一定數量內丹,提升實力;60Lv開結婚,結完婚可以課金生仔,成為助力;70Lv開閉關,閉關一次可以悟出專屬武功,每次要俾錢先有得閉;80Lv開國戰,萬人圍抽;90Lv開討伐,N人一齊打12位數血嘅Boss;100Lv,你可以轉生了,返返Lv1重練,數值當然又強咗啦!
 
屌你老母,哈哈哈,真係好好玩啊!!!如果今日先出俄羅斯方塊,唔知有冇電腦代打呢?
 
最好笑我聽到,今日都市人好忙,有自動係必須,等你返放工係車都可以掛下,我心諗,你咁忙咪唔好打機囉!
 
仲有啊!手動就叫打機,你自動打,叫睇戲咋!不如你上網睇達哥打機算啦,佢仲識講笑,而唔係on99睇住個人物自己行自己打啊!
 
蔣薇
www.fb.com/maydreaming
 

COMMENT