2017/12/08

《三十過後嘅生日》

20140929092440189
 
網上資料圖片
 
生日,一年一度,曾經係個無比重要嘅日子。
 
猶記得十八歲嗰年生日,搵咗所有朋友去卡拉OK,差唔多三十人一齊慶祝,第一次正式飲得爛醉;二十五歲生日,同最重要嘅女友到外地旅行慶生;三十歲呢?
 
WhatsApp group會有無數嘅生日祝賀,Facebook也派上廉價嘅快樂,直到我將生日提醒閂咗。
 
隆重其事,今日睇起嚟好似有啲幼稚,生日嗰日可能;都要返工,客人唔會因為你生日而少煩你一吓,工作亦唔會避開你嘅生日,帶住疲倦嘅身體,慶祝大大打咗折扣……
 
朋友難約,各有不同生活,只餘下最熟嗰幾個,嗰幾個無Facebook通知都會記得你生日嘅傢伙,飯局唔舖張,可能喺大排檔食煲仔飯,又可能譚仔,亦可以隨便茶記吹個水,無既定嘅生日歌,亦無蛋糕同蠟燭,許一個虛幻嘅願望。
 
回想起細個生日肯定會去唱K,四送一優惠,免費蛋糕同甜到麻痺嘅糖水汽酒,預計到會出現嘅生日歌,多年一樣,群星生日歌,係青澀青嘅年輕。
 
依家生日,我會放自己一日假,休息一陣,同深愛嘅人食個飯,生日禮物,唔重要,雖然仲好多嘢缺,但係以禮物嚟講,又好似乜都唔缺。
 
人生只得數十載,可能我哋已經走過咗生命嘅一半,上一半嘅人生,係驚喜,過咗三十,我會認為,係感恩。
 
以前我哋會去追求快樂,凡事都係新鮮事,每年嘅生日都期待驚喜,但閱歷多咗,你開始會有預期,亦試過好多嘢,要再去令你震撼唔係易事,喺轉變中,你會落寞,因為無開心事,就係唔開心!
 
直到你想通一件事,原來人生無咩唔開心事,就值得開心啦,開心唔洗特別去追求,一切回歸平淡。
 
今日我需要嘅,只係嗰幾個重要嘅人,走埋一齊,或者做啲咩,亦可咩都唔做。
 
啱啱嘅生日,有一個人煮咗一餐飯比我食,雖然碗都係要我洗,但呢一切都令我覺得幸福。
 
有人問過我,想要咩生日禮物,許咗咩願。
 
我會話,願望實現咗,禮物都有咗,就係你同你同你同我渡過一年又一年。
 
蔣薇
www.fb.com/maydreaming
 

COMMENT