2017/12/15

《畢業N+1》

2017_12_15_蔣薇MenClub
 
網上資料圖片
 
唔經唔覺,已經畢咗業N年,到咗一個覺得自己老嘅年齡,望住班學生哥,你好怕佢哋叫你叔叔,有日放假無嘢做心血來潮,坐咗一架巴士,去返中學望望,行返條斜路,去到一間幾清幽嘅學校,假日無人,你只可以從大門睇到裡面少少,但一陣熟悉嘅味道傳來,呢陣味你唔識講,但每間學校都有呢種味,或者,係青春嘅味道。
 
人生,有五年到七年會喺呢度渡過,呢五至七年,係你由小朋友,到無咁小朋友嘅時間,你開始記得發生嘅事,小學嘅嘢好多都唔記得,但講到中學你點都會記住某些情景,無比清晰,可能呢段日子係你最開心,最無慮嘅日子。
 
裡面,有你到今日都仲有聯絡嘅好兄弟;
裡面,有你到今日仲記得佢名嘅暗戀對象;
裡面,有你年少無知年少輕狂嘅威水史。
 
人生七十古來稀,而我哋最少有十分一時間,係花係呢度。
 
中學時代,好遙遠,好多嘢你唔記得,但如果你仔細去諗,一幕又一幕嘅回憶就會出現。
 
點解每日都要早會,排晒隊點名,究竟我前面同後面係邊個?今日仲有冇聯絡?
 
原來每日我哋都會行五層樓梯,最少上落幾次,今日行兩步路都話攰,唔怪得之以前咁Fit!
 
遲到要抄罰抄,仲俾訓導鬧,遲一分鐘係遲,咁不如遲夠一堂,食埋早餐先返!
 
當年每日都會食嘅飯堂今日仲喺度,你唔會明白今日食個Lunch都要五十幾蚊,當年點解呢間燒味賣11蚊,仲可以送例湯。
 
Lunch time點解可以著校服皮鞋打波,打到成身汗仲可以返課室繼續上堂……
 
今日睇,唔少老師都係呃飯食,但總有一兩個你覺得佢教你做人嘅事可以終生受用。
 
中學,幾個人可以講足一晚,有唔少笑話,往事,次次都要講,但次次都會笑,講得開心笑得高興,最後總會補上一聲嘆氣,原來自己已經畢業N年,每過一年,就係N+1,青春往事,記得清楚,但亦愈走愈遠。
 
返到十七歲,重返校園,呢種題材永遠有市場,因為大家都想回到青春,回到校園,就算係逃學威龍,只要你可以返入學校,點都會有感觸。
 
每個男人,都曾經年輕,當時,我哋無男人味,亦唔懂男人,更唔係男人,只不過係一班小朋友,N年後,大家再聚埋,結婚嘅結婚,生仔嘅生仔,角色唔同,係人哋老公同爸爸,但唯有我哋一班舊同學喺度,大家先可以拋低身份,再次感受少少中學情懷。
 
少少,只係少少,但係,少少都好。
 
蔣薇
www.fb.com/maydreaming
 

COMMENT