2018/03/16

《每人身邊總有一個豬隊友》

2018_03_16_蔣薇MenClub
 
網上資料圖片
 
今時今日單機遊戲已經愈來愈少,新遊戲都講求互動,可以俾你同朋友一齊對戰、合力作戰PVC或者PVP等等,同朋友一齊打機固然開心,但亦帶出一個問題--豬隊友。
 
豬隊友有乜特徵?不外乎打得屎、無技術、陀衰家。
 
隊友作用係乜?作出貢獻等你無咁辛苦,但有種隊友佢出現,就好似等於打少一個,白白由五打五變成四打五,當你好認真作戰時,佢好似遊魂咁唔知做乜,你開咪叫佢都好,佢都總係慢三拍,成班人死晒先姍姍來遲,再送人頭。
 
有時見佢用新角色,我會問:咦,你幾時練咗呢隻嘢?佢會答:無練啊,見幾得意咪試吓玩囉!
 
當時我心中比佢呢句暴擊咗,試吓?玩吓?其實你可以開個對電腦模式去試去練,點解要喺實戰度練嘢?莫非你係個M?喜歡俾人虐待?仲有啊,你練角可唔可以先上網睇吓佢點打,基本上網上大把高手有教學,起碼你會知點用先啦,入到遊戲先慢慢去摸究竟點用?
 
當我咁講,佢就會話唔好浪費時間去睇,直接打咪幾好,我即時著火,喂,你唔識用,遲早都要上網睇,你慢慢摸要三個鐘先知,人哋三分鐘講完你知,你再用十五分鐘去練好過你自己摸啦。
 
但局已開,一切已成定局,落得輸嘅下場。
 
最嬲係,佢仲笑笑口同你講,哎呀,真係好難用啊,下次都係唔用呢隻喇!
 
我嬲,佢又會話,打吓機啫,你咁認真做乜,大家都係求開心,輕輕鬆鬆咪幾好。
 
我都想開心,我都想輕鬆,但打機你唔係享受過程咁簡單,你仲要求勝嘛,有邊隻遊戲你輸會仲開心?你比人虐殺都會好高興?結果,我當你唔重要;過程,又唔見得好開心喎!你一路係咁死,我一路Carry得幾辛苦,你就輕輕鬆鬆,我就打出200%實力先可以打得平手,你知唔知我有幾辛苦幾累,當你Hea時,責任就落喺身邊隊友身上,你仲同我講求輕鬆?
 
擁有一個豬隊友,就好似無間地獄,突然一個Msg,哥,帶我飛!我真係好想扮睇唔到,但又抵唔住氣咁比你喺遊戲入面見到我,仲要打電話嚟叫我玩。
 
你會問,咁咪唔好同佢玩囉。
 
我講個故事你知:
 
有一次,我忽然發現,佢一波神操作贏得一場戰爭,我終於講咗句:「勁喎!」
 
佢:「同你打咁耐,都唔想次次拖累你嘛!」
 
我:「睇吓下場你仲有冇咁神先講啦!」
 
因為我知道咁大個人要搵個朋友同你一齊打機買少見少,再豬嘅朋友,都好過更勁嘅陌生人,唯有開住個咪一路屌一路玩,等佢無咁雷。
 
蔣薇
www.fb.com/maydreaming

COMMENT