2018/07/13

《球場醒目仔》

fdCEKJOnNklphazPFIbmya-cDluRM8NtvI5oxbyOaMU
 
網上資料圖片
 
球場上只有勝負,無論你幾強幾華麗都好,贏就係贏,輸就係輸,但有好多時贏咗場波,輸咗人格,法國大戰比利時嘅麥巴比就係一個好好例子。
 
補時階段為咗拖延時間可以去到幾盡?明明唔係自己波都夾硬玩你一輪,浪費你半分鐘時間,換得一塊不痛不癢嘅黃牌,以戰術去睇,真係無撚敵,但作為對手、作為觀眾,呢一幕睇到又受唔受樂?
 
每個人都要為自己嘅行為負責,一面黃牌,佢得到應有懲罰,可以話無拖無欠,呢種我稱之為球場醒目仔,喺鏡頭外、球証背後做出好多骯髒手段,從而得到著數,走向勝利。
 
插水、拉手、翻滾、收山腳都可以稱之為「戰術」,球場無父子,假如一腳將對手重心收到山,一個紅牌換到對手全盤收皮,值唔值?值啊!但係咪真係要咁做?今日仲有冇體育精神呢樣嘢?無,因為無一個冠軍叫體育精神冠軍,你再無體育精神都好,贏到最後你就係冠軍,公平咩?
 
If you cannot beat them, Join them!
 
一個汽車修理技工有個士巴拿喺身係好正常,作為足球員無咁上下演技又點上場?好多人會話,挑,咪判咗黃牌囉,仲想點?不如倒轉講,人人都咁做,場波會變成點?掂一掂就一起翻滾,球證睇唔到就詠春大戰,全場收山剷,仲係唔係踢波?
 
規則係咁,灰色地帶大把,用唔用,係你決定,你吹佢唔漲都好,都唔係要去認同呢個做法啩?
 
正如現實中有好多職場醒目仔用手段去贏,你又會唔會為佢哋鼓掌,再講句風涼話話係戰術?唔會,因為佢影響嘅係你;政治都係一樣,用規則、用權力去打壓對手,你又會唔會覺得成王敗寇?唔會,因為你知係唔啱。
 
醒目仔太多,老實人太少,所以先顯得老實人可貴,香港隊無踢世界杯,所以球迷都係支持外國球隊,唔存在咩歸屬感同身份,有人係勝利球迷,支持強隊贏;而我就只睇球賽,邊隊贏邊隊輸好閒,就好似西班牙對俄羅斯,開波我都係偏向西班牙,但踢到咁,補時我反而支持俄羅斯;尼馬係好波,但佢每次翻滾我都會爆粗;麥巴比係好波,但佢呢球界外球令我由心厭惡佢。
 
或者當時我買重法國出線,我會由心欣賞佢呢一招,仲可以再嚟多次,你紅牌唔緊要,最緊要係我有錢收。
 
蔣薇
www.fb.com/maydreaming

COMMENT