2018/10/19

《變成股票資訊台的WhatsApp Group》

may menclub 2018_10_19
網上資料圖片
 
一個圈子一個群組,WhatsApp內肯定有好多群組,但愈長時間,群組就愈少對話,大多數都係由生日提示衍生嘅「生日快樂群」,每逢生日就一大堆「Happy Birthday」「生日快樂」「祝你年年咁靚」「祝你早日結婚」之類嘅一人一句,講完事主出嚟「多晒」,再次回歸沉寂。
 
但比起生日群,更令人厭煩嘅就係股票群,一有大升大跌,一班有買股票嘅股民就會出現討論,唔講我仲以為去咗交易現場……
 
幾時開始,我哋嘅關係只限於生日快樂?又幾時開始,我哋關係餘下金錢?除咗生日快樂同股票搵食之外,仲有冇話題?
 
或者我哋唔會再講學生時期老師嘅趣聞,亦唔會重溫當年明戀暗戀嘅逸事,更唔會幼稚咁搞爛gag冷笑話,成班成熟咗,成熟晒,所以現實咗講錢最實際,唔通仲同你鳩嗡?
 
工作已經需要長時間同金錢同成熟打交道,工作以外,連朋友呢個避風港都變成大家各自講錢嘅地方,講真,要講股票我睇新聞,入真係股票群會唔會專業少少實際少少?
 
睇完一大堆股票資訊,完了,真係完了,下次又係唔知邊個生日或者唔知股市做乜春。
 
感覺上唔會再約出嚟聚一下,大家各自有生活同忙碌,我唔想同你太認真,你亦覺得我唔認真,相對無言,不如mute咗個群佢,得閒飲茶。
 
斷捨離,係成長路上必修課,我已經唔再想去將大家拉埋,不如乾脆一刀兩斷,知唔知睇住大家關係變得不堪入目,比起一時之痛更難受。
 
每次WhatsApp Group出現notification,我都知道,一年已過,又係時候將個群mute好,一年之後,大家有冇變?變得更遠,諗返生日快樂都愈來愈少人附和,唔知係好事定壞事。
 
諗返起,當年一齊渡過嘅暑假,數字球拋上天空,今日仲會唔會有人接住?沙灘波數字球已經唔再吸引,大家改為玩股票數字球。
 
搵錢係重要,但當你有錢時,身邊分享喜悅嘅人愈來愈少時,好似……有點寂寞。
 
蔣薇
www.fb.com/maydreaming

COMMENT