2018/10/26

《一個人嘅路》

2018_10_26_蔣薇MenClub
 
網上資料圖片
 
人生就好似行路。
 
孩童時代喺父母嘅照料下,我咃喺家中爬吓行吓;
學生時代喺體制嘅壓制下,我哋迫住向前盲目衝。
 
路,出嚟社會後,大家開始各散東西,有人忙緊當差,要做體能訓練;有人去考會計師牌,日夜溫書;有人做保險經紀,係咁約朋友為開單;有人安安份份做文員,朝九晚六準時收工;有人做少奶奶唔駛做。
 
唔會好似以前咁,就算你分文理商都會知同學大約做緊乜,大家都係返朝八,一齊上堂,一齊食飯,一齊考試,我哋開始走自己嘅路,間中出嚟聚會講近況,你講你做乜,佢講佢煩乜,但大家都係聽完就算,唔會明,更唔會幫到你乜野。
 
還好,你喺公司會有上司、有老闆,佢都會指點你,教你,又或者玩你,但至少,你有個方向你有個人行前面,我哋只不過係換咗批隊友,路上,你依家係一個跟隨者,行呢個方向,未必係你想行,但為咗錢同生活,你默默跟隨向前。
 
行到咁上下,你會諗,我究竟想行去邊?
 
有人一世都唔知自己想行邊,睇到咩景色,渡過咩苦難,只係朝有食物嘅方向前進、摸索、原地踏步、甚至向後搵之前未食完嘅野,為生存,你可能會兜兜轉轉,而你嘅生命,亦只係一頁一頁食物圖。
 
到有一日,你望向遠方,你會諗,究竟自己眼見以外嘅世界係點,你離開公司嘅大隊,行另一個方向,前面一片黑暗,你願意向前嗎?
 
有無數原因,令人卻步,亦有無數原因,令人向前,唯一一個相同之處係,你卻步同向前都係一個只關係自己嘅選擇。
 
當你向前,恭喜你,你已經係一個人。
 
你走緊一條孤獨嘅路,唔會有隊友喺身邊幫你披荊斬棘,亦唔會有人叫你向呢個方向前進,努力就會有出路,更唔會有人可以俾到意見你,因為大家都唔知黑暗後有咩。
 
好多朋友會好奇,我做緊乜嘢,佢哋理解唔到,亦唔需要理解。
 
今日嘅我哋已經可以一個人向前行;
 
或者仲會害怕未知,但都會勇往直前;
 
唔會再問有邊個一齊,前面有咩;
 
仆咗街嗰陣,我哋可以講,全部都係我自己嘅選擇;
 
登上山頂睇到無比風光時,你亦可以講,全部嘢,都係我嘅選擇。
 
蔣薇
www.fb.com/maydreaming

COMMENT