2018/11/02

《容許不忠的關係》

2018_11_02_May Menclub
 
網上資料圖片
 
最近有篇文講到,如果女人可以睇開少少,男人出去偷食都唔係問題,放喺女性論壇當然被圍攻到體無完膚,不過就邏輯講,佢又唔係錯,但又唔係無問題,所以今次同大家討論吓個問題所在。
 
關係,可以千變萬化,有人兩個人一齊唔結婚,有人各自出去搵食,更有人出去搵埋俾伴侶食,仲有誇張少少同伴侶一齊食,對於佢哋嘢講,問題並唔係呢段關係有幾多個人參與,而係一種彼此認同嘅承諾。
 
我從來都唔覺得愛情係獨一無二嘅模式,一夫一妻只不過係其中之一,亦有好多選項,當然並唔係一種普世價值啦,咁問題出喺邊?
 
睇開少少,總有人可以咁做,但問題係,唔係我出去偷食完,叫對方不如睇開少少,繼續呢段關係,如果你喺偷食前,就知會對方:「喂,我想出去偷食,但我又唔想呢段關係會變,你可唔可以睇開少少,得嘅我出去,唔得嘅就算。」咁就公平。
 
曾經我都被試過綠帽,最後點?選擇原諒囉,亦係佢所講嘅睇開少少,但係唔係真係睇開?錯,只不過係將以往建立嘅一切大打折扣,以後亦會有條刺存在,明顯關係已經變咗,所謂睇開少少就得,表面係,但事實又係點?大家心中有數。
 
有時將心比己,伴侶出去搵食,你可唔可以睇開,假設你睇得開,當然係好,但你亦需要清楚,呢種模式唔係普遍嘅做法,佢心中唔當你係唯有、唔需要擁有你、唔需要有你個心,有好多考慮,但所有考慮都指向一個點,佢唔會好似一對忠貞於對方嘅情侶咁愛對方。
 
男人,我太了解,不忠,人前一個講法,背後一個做法,我從來都唔會做道德撚,叫你唔好出去食,因為無論情慾、性慾都係一種難以控制嘅事。
 
唯一需要嘅,你玩還玩,唔好比人知,係唔尊重之中,帶返少少尊重。
 
出去玩出去食,你仲想叫對方睇開少少,除非你另一半係傻,如果唔係你何德何能啊?
 
咦,我諗起一個朋友嘅朋友,佢係上市公司主席,身家以億計,有七個老婆,大時大節仲可以同枱食飯,喜氣洋洋。
 
所以幾時都話,有錢係好多嘢都可以衝破,問題出在,你無錢啫。
 
蔣薇
www.fb.com/maydreaming

COMMENT