2018/11/16

《點解buffet無生蠔》

CMM_900_500
 
網上資料圖片
 
知唔知點解自助餐愈來愈少生蠔供應?特別係出名嘅酒店?最近聽咗個行內食品專家講到,先知背後原因。
 
耐唔耐都會有食物中毒事件,話喺某某酒店食完生蠔之後食物中毒,然後傳媒廣泛報導,一餐飯有係食咗咩出事,無人知,首當其衝嘅當然係生蠔呢種感覺易出事嘅生冷食物。
 
每次出事,食環都會去搵出事原因,搞完一輪,將食材檢驗,落架,一頭半個月之後,又搵唔出咩問題,咁唯有向源頭推進,再追查落去,最後邊個要負責?邊個要賠錢?你唔會知。
 
食品專家講到,原來好多酒店已經怕咗呢種公關災難,最後食環還你清白都好,邊個知?報紙唔會幫你講,啊,其實唔關佢事,但當然如果真係關佢食物處理事時,你就仆街喇!
 
呢種事件對於酒店講,係災難嚟,肯定客量大減,你又要hold住所有生蠔唔賣,跟手唔知要做幾多廣告同公關先可以返到家鄉。
 
名聲呢樣嘢,一出事就會被網民百般聲討,你解釋都無用,肯定比人鬧得仲金,但最後無事之際,又有幾多人會幫你講好說話?無,網民會再搵下一個故事去屌去跟進。
 
唯有少做少錯,先可以留返自身清白。
 
另一方面,現實上亦有好多指控,係單方面指控,口同鼻拗兼搜證困難,但你早已成為全民公敵、賤人、仆街,最後法律還你一身清白都好,都不能洗白到同以前一樣。
 
做人、做生意都好,你唔知客人同身邊人會有乜情況,你做錯少少嘢都好,都會被人當成黑材料,到時你就永不翻身。
 
告你,然後告唔入,仲可以大叫法律不公,話係黑暗日子,咁被告點先可以證明清白?唔知,更唔好話得到一句道歉。
 
今時今日香港,做乜都好都要識得保護自己,就連你個品牌做廣告都唔可以用晒男人、用晒白人,應該要照顧到唔同人種、取向、弱勢,咁先係政治正確。
 
以後如果你食到間餐廳有生蠔食,應該感恩,因為佢敢提供,都已經係好勇敢,記得食多兩隻。
 
蔣薇
www.fb.com/maydreaming

COMMENT