2018/11/23

《Facebook後的新社交平台》

2018_11_23_May MenClub
 
網上資料圖片
 
Facebook?老嘢先用。
 
呢句嘢係我喺街聽到嘅,講嘅應該係學生,作為正在掃緊Facebook嘅人,我當然無出聲。幾年前新一代已經唔再用Facebook,轉攻IG,Snapchat等等,而用咗咁耐,Facebook似係一個習慣,起身第一時間會掃返五分鐘十分鐘先落床。
 
早排連我老豆老母都加入咗Facebook,我就知,Facebook離末日不遠了……
 
最近你有冇發現用Facebook時間短咗,因為你發現好少朋友嘅動態更新,三五個post就會夾雜廣告,掃多兩掃你就發現無嘢睇,繼而關咗佢。
 
可能,我哋已經過去咗一個用Facebook去表達自己嘅年紀,好多時你想講吓心情會覺得好似太作狀,想評論吓新聞又好似太過政治,見到仆街嘢想屌返兩句又覺得口臭,就連去旅行打卡,都已經過咗氣,打咗幾年卡,你唔悶我都悶啦。
 
用量少之後,你好多時都充當cdrom,但睇睇吓你又會嫌悶,專頁唔比錢又唔會有流量派到比你,最後入到你眼嘅唔係俾錢sponsored post就係+1小編俾答案你類別。
 
當一個社交平台,唔再有社交感覺,你上去就係睇吓新聞,睇吓廣告,再一齊屌吓柒人柒事,認真,咁算係咩社交?
 
或者今日大家對Facebook心生厭倦都係好事,大家開始發現不斷喺網上打造虛擬自己係無用,亦發現真心朋友唔會喺網上同你交流。
 
標題黨、遊戲黨、呃like黨、憤青黨,我只係想睇吓朋友近況,咁簡單都做唔到。
 
今日我哋會諗,下個目的地喺邊?
 
IG?Snapchat?咪又係舊酒新瓶⋯⋯只不過換個形式去做返上面嘅事。
 
人會成熟,成熟亦會守舊,收藏自己,我哋已經唔係十八二十二,想展示比暗戀對象睇自己嘅事,講公事就更難明,我哋仲需要乜網上社交?
 
記唔記得當年Facebook點開始?係大學圈內,因為大家都想表達自己,時而世易,大學生都變晒中佬,我哋學識低調同收藏。
 
今日你問我想要社交活動會用咩平台?
 
我會答你,出嚟飲杯嘢最實際!
 
蔣薇
www.fb.com/maydreaming

COMMENT