2019/01/04

《戴套好過走塑》

images
 
網上資料圖片
 
環保,係一種美德,每次我叫外賣返屋企食,都會盡量唔拎餐具,屋企有,點解要拎?但最近走塑成為一個大議題,麥當勞話唔再提供飲管俾人萬人圍插。環保,由一種美德,變成一種爭議,一種對抗。
 
早喺幾日前我喺麥當勞食嘢,已經再無飲管提供,ok fine,我就咁飲都得,但我同朋友發現有個問題,如果你expect我打開個蓋飲,咁呢個膠蓋嘅壽命只係由上餐到我打開時,咁環保唔俾飲管,又咁奇怪加個無意義嘅蓋造成浪費?
 
咁環保點解又要用紙杯,膠杯,膠匙?咁環保又點解製造咁多垃圾玩具?推到最尾,可以好恐怖,因為你覺得環保,喺另一個人眼中可能係唔環保,一個推一個,幾時停,幾時係最好,根本無人知。
 
有個朋友,佢絕對唔係環保人士,佢從來都唔會理咩環保,用得就用,要得就要,佢有一次拎住個condom講:「老友,我就唔係環保人士,但正因為我唔環保,堅持用套,所以我唔會生仔,唔生仔,就唔會有下一代,更唔會有下下一代,有咩嘢環保過我戴呢舊膠?同我講走塑走塑,計我話,戴套戴套啦!」
 
對於佢呢個理論,我絕對同意,因為佢無下一代,所以佢唔需要為我哋下一代去積德,佢無下一代已經係最大功德了。
 
反觀今日嘅環保份子,最大問題係佢哋將自己生活一套架係別人身上,要人都接受佢哋一套,就好似素食主義咁,你只係食飯唔食肉,唔係唔得,但唔係人人喜歡囉。
 
假如有日有個苦行僧走出嚟講,你不如唔好用iPhone,生仔嘅尿片都唔好用,用返尿布,出街行路好喇,仲要唔好著鞋,你哋又接唔接受?
 
今日,我叫外賣都會走餐具,去麥記都唔會特別去拎飲管,但當我見到有師奶教導個小朋友環保時……
 
我腦海出現咗一句句子……
 
當日唔戴套,今日要走塑。
 
蔣薇
www.fb.com/maydreaming

COMMENT