2019/01/12

《私竇》

download
 
網上資料圖片
 
男士們,喺女朋友或者老婆壓迫之下,有冇覺得自己生活空間愈來愈細?想放漫畫、模型、玩具都會被人嫌棄?喺高達二萬蚊嘅呎價下,你想要一米乘一米嘅空間,都要數以萬計去支持,錢都事少,俾人日嘈夜煩先係重點。

有冇諗過,自己可以擁有一個私竇?
 
最近有朋友提議夾份租個工廈單位,萬零蚊已經有成千呎嘅地方,十個好友夾,每人每月連埋燈油火蠟都二千蚊有找,但你就可以擁有一個絕對寧靜嘅空間。
 
一排長櫃可以放大家嘅玩具,彼此可以互相欣賞,各式各樣遊戲機都可以放置,得閒仲要以一齊打機,有沙發可以俾你享受音響,喺音樂下,你唔會突然間聽到女朋友嘅抱怨同責罵;收工想放空一下自己,亦可以有個地方落腳,直到開心時間完結,乖乖地返屋企面對現實。
 
更好嘅係,你唔需要再同伴侶喺土地問題上有爭執,成間屋都可以放晒佢嘅衫褲鞋襪包包,亦唔怕過年會俾親戚朋友嘅小朋友破壞你嘅心血。
 
租個迷你倉,只係放嘢都要一千幾百,點解唔搵三五知己一齊夾租個地方呢?
 
一班兄弟,得閒可以相約飲吓酒,整個電爐就可以打邊爐,唔需要再煩聚會地方,比起迷你倉更有價值嘅係,你可以同班兄弟得閒就見吓,打吓機,吹吓水,計埋計埋,真係慳唔少。
 
女人永遠都唔會明白私竇呢個概念,當兩個人一齊時,佢哋先會覺我呢段關係係維持緊,時間係愈多愈好,但其實男人極需要私人空間,無論係一間房,一個櫃定一個私竇,有事我哋唔一定需要你關心問候,俾我哋靜吓就已經還神。
 
而女人喺屋企入面通常都係侵略者,佢哋會界定邊樣嘢係重要,你嘅嘢就係無用,佢嘅嘢就係必須,最好佢話晒事間屋放乜,面對侵略者,我哋唔會同佢嘈、同佢解釋、俾佢理解,因為全部都無用。
 
喺私竇入面享受寧靜之時,突然間有另一個朋友上咗嚟,兩個人相對無言,各自享受寧靜時光。
 
幾千蚊,值唔值?唔需要答案。
 
你只需要搵多幾個同病相憐嘅朋友,再去搵個地方,組織你哋嘅小空間就可以。
 
蔣薇
www.fb.com/maydreaming

COMMENT