2019/01/18

《十年挑戰》

may menclub 
網上資料圖片
 
最近興起十年挑戰,人人貼出十年前十年後嘅照片,男人老狗十年前後睇相,最大分別咪係塊面圓咗、肚腩大咗、頭髮少咗之類嘅嘢,貼完講完大家完成咗一次網路潮流之後,仲有咩?
 
十年對於男人講,其實發生咗數之不盡嘅嘢,俾人睇還俾人睇,咁你又有冇諗過呢十年,你做過乜,你改變咗乜?
 
十年前,你可能仲讀緊書,仲係一個入世未深嘅小員工,今日你做緊邊行,做緊咩位,係邊返工?十年前後,你搵到自己嘅事業未,你搵到自己嘅路未?職場之上,你熱誠仲存在嗎?會唔會變成你曾經討厭嘅老屎忽?你又覺得嚟緊呢十年會點行?
 
家庭方面,仲同屋企人住緊嗎?親人好嗎?有冇人已經永遠離開你身邊?又或者你屋企多咗新成員,已經同居、結婚,同你老婆一齊住,甚至有一個令人又愛又恨嘅小朋友?家庭係你心目中有冇改變?你由一個小朋友變成一個大人,由接受變成付出,今日你再睇家庭,你會唔會有一種新睇法同感受?
 
愛情方面,人來人往,或者身邊人已經轉換好幾個,你今日同當然情場初哥有咩唔同?學識同女人相處未?忍讓呢?接受呢?企硬呢?愛情仲係唔係熱情刺激?定你覺得細水長流都係好事,又或者你已經變得淡淡然,同埋有少少想離開?愛情會唔會唔再係大眾所講嘅愛情,你自己一套準則又係點?
 
朋友方面,會唔會好似其他人所講,人愈大愈少朋友,老朋友仲熟嘅又有邊個?當年連電話號碼都識背嘅人係邊?今日會係你常用聯絡人出現嘅又係邊個?有冇人嘈過?有冇人因為各自生活而疏遠?今日你對朋友仲會唔會好似以前咁乜都講,定你對身邊朋友都會戴上面具?
 
想法方面,有冇嘢你以前堅信正確嘅今日唔再相信?又有冇嘢你以前覺得唔會做嘅今日你做咗?今日你仲會唔會好放膽咁講你所想?會唔會覺得有時講都晒氣,不如留返啖氣?今日你更確信你自己嘅信念,定你已經變得好隨意,乜都無所謂?十年後你又會唔會成為你眼中嘅廢老?
 
夢想方面,十年前你想做嘅嘢,做咗未?定你連夢想都已經唔再奢望?
 
十年,唔止外表,係相片以外,不如諗多少少。
 
蔣薇
www.fb.com/maydreaming

COMMENT