2019/01/25

《朝早沖涼定夜晚沖涼》

2019_01_25_May MenClub
 
網上資料圖片
 
男士們,請問你哋係朝早沖涼定夜晚沖涼?近日有朋友佢同男友吵大鑊,因為男友佢出完街返嚟從來都唔沖涼,直接除衫除鞋瞓上床,就連之前係著拖鞋出街都係一樣,我心諗,乜有人喺夜晚返屋企唔沖涼咩?原來真係有。
 
知唔知香水發明嘅原因係咩?係因為以前西方人係唔沖涼,咁咪臭,所以咪用香水去蓋住自己嘅體臭,你明點解某種傳統香水係咁濃烈啦?當年西方人迷信,覺得沖涼會病、會死、對神不敬之類,所以好多人死咗都唔知咩事,更未講到曾經倫敦街頭全部都係排泄物。
 
今日西方人對於沖涼又點睇?原來都係可以幾日唔沖涼,咁我又理解嘅,又凍又乾的確係無咁需要沖,你話係東南亞國家,潮濕天氣你唔沖涼真係可以生菇。
 
但我唔明,點解朝早沖涼而唔係夜晚沖,點解要瞓一張極唔衛生嘅床,可能有腳臭、汗臭、頭臭等,係唔係習慣咗陣味會爽?
 
好笑在,朋友男友佢唔肯沖,話唔會俾任何人控制自己唔想做嘅事,喂大佬,衛生同你想唔想做有咩關係?即係你痾屎唔抹係宣示緊主權啊?床、被都係好易培養細菌、蚤嘅地方,一陣又臭又有嘢咬都唔知點算,最慘係你嘅另一半明明沖乾淨都俾你害。
 
講真,男女同居會有好多問題,例如廁所板要放低,去水位全部都係頭髮要清之類,習慣可以係衝突,有機會包容,但衛生呢件事就真係要改變。
 
講返外國,有唔少訪問問佢哋點解朝早先沖涼,最後主持解釋一輪夜晚沖嘅好處之後,佢哋都疑惑咁諗,又好似幾有道理喎。
 
但偏偏朋友另一半仲死撐,覺得干涉自由唔肯退讓,ok,分手囉,咁大家都唔需要頂唔需要煩。
 
兩個人相處,如果兩個都唔肯改變,咁不如各自住咪仲好?
 
調返轉,如果個女仔幾日唔沖涼,你又接唔接受到?出完街未沖涼周身汗瞓係你旁邊,你又食唔食得落?我知實有人好呢味嘅,咁你食埋我個位喇!
 
蔣薇
www.fb.com/maydreaming

COMMENT