2019/02/01

《淘寶的啟示》

MAY MENCLUB
 
網上資料圖片
 
馬雲話:「很多假貨,產品和服務做得比真品還好。」淘寶一直都俾人覺得係假貨充斥嘅地方,但有冇諗過,假貨消失之後嘅淘寶係有幾咁恐怖?
 
最近網上有個視光師話自己賣鏡片好平,但都俾人嫌貴,唯一可能係對方用淘寶價去比較,香港有咩生產?除食品外,貨物十居其九都係進口,你喺香港賣嘅貨,好可能同時間喺阿里巴巴賣平緊十倍,比價錢比唔過,比服務更加唔駛同「親親親」去比,香港客服唔係俾人屌就係屌人。
 
好多人感嘆,淘寶打破咗價值觀,俾人知道你喺香港買嘅嘢,係貴過成本n倍,而商家無奈位係租金人工咁高,佢唔升價根本做唔到,即係又係地產霸權問題啦。
 
喺成本優勢減少之下,外國訂單少咗,大陸廠好多由OEM轉型,用返原有外國質素推出自己品牌,分分鐘仲可以係用料上面再做好,如果簡單日用品唔講牌子的話,根本無得同佢哋鬥。
 
香港有幾多行業係依賴淘寶為生,行喺街上面,幾乎所有小店無牌子嘅都可以喺淘寶搵到,甚至有好多專業都可以用淘寶代替,包括翻譯、設計、攝影等等,面對淘寶嘅衝擊,我哋可以點?
 
視光師先生佢選擇屌個客去淘寶,但佢由始到終都講唔出自己有乜優勝之處,究竟我哋同淘寶有咩唔同?話晒香港都係世界最先進嘅城市,點解我哋講唔出一樣嘢你俾一個成日睇唔起嘅發展中國家優勢嘅地方?
 
一邊我哋狂屌政府打擊uber,但自己都未接受到衝擊,其實大家咪又係另一個的士司機去維持自己利益,但少人會諗點樣去建立好嘅優勢。
 
視光師可以驗眼,淘寶點都無可能同你隔空驗,喺服務上已經唔同,同時實物亦可以令消費者更有信心,你講唔講得出係淘寶買嘢有咩風險?咁多商家你點揀,分分鐘搵到間呃人嘅,但你有長期合作廠家就有保證啦!更未計喺運輸過程中有更好保障,出起事上嚟,你起碼有間店比人搵,淘寶?唔覆你就唔覆你,你上溫州搵個一百幾十蚊悔氣?售後有咩服務?點樣再去建議下一次購物?其實有無數嘢可以做。
 
有冇聽過肥仔開倉?唔駛上淘寶,唔駛去深水埗!佢好清楚自己賣嘅嘢係淘寶同深水埗都有,但佢最大優勢咪就係唔需要等,即刻同方便性贏咗,係貴十蚊八蚊咁又點?車錢都喺度啦。
 
時代巨輪下,你無得唔變,請唔好變成自己口中嘅的士狗,你再諗吓,如果當淘寶嘅服務再次提升,你仲可以點?
 
蔣薇
www.fb.com/maydreaming

COMMENT