2019/02/15

《情人節應否慶祝?》

WhatsApp Image 2019-02-15 at 3.26.48 PM
 
網上資料圖片
 
同中學生應否談戀愛一樣,情人節應否慶祝都係一個講到爛嘅問題!
 
好多人話,情人節買花食飯貴一大截,點解要特登去慶祝,如果有心嘅,日日都係情人節啦!
 
作為一個已婚人士,第一個婚後情人節,的確係有少少值得思考嘅地方,我會諗,都唔係情人喇,仲慶祝乜嘢?要慶祝不如等結婚周年先慶祝啦!
 
心態變係正常,當年熱戀之時,大家都會珍而重之每個重要日子,但到你穩定仲結埋婚之後,朝見口晚見面,好似有種麻木嘅感覺,或者係厭咗,唔係討厭,而係每日見到覺得有點多。
 
但見到電視訪問一個阿伯情人節買花,仲分享佢嘅秘訣:
 
「大家互相遷就,她大聲你小聲,她再大聲你收聲。」
 
我忍唔住想大叫一聲九叔!
 
不過再睇吓佢個樣,唔似係悲傷,反而有種甜甜地嘅感覺,再細諗,到你六張嘢仲會唔會買花比你老婆慶祝情人節?唔好講到咁遠,有唔少人連十年八年都捱唔過。
 
呢位九叔,比起唔少懶係看透世事嘅情侶要幸福得多。
 
今日你望住呢個「老婆」,仲會唔會有種戀愛嘅感覺?係愛定係責任?如果你到結婚後都仲有戀愛嘅心動,咁恭喜你,你呢段關係好甜蜜。
 
結婚後嘅關係,通常都會改變,有人話,似家人;有人會變成阿仔老母,阿女老豆;又有人覺得另一半變成母夜叉;更有人將老婆放喺屋企,扮加班出去會情人。
 
有冇諗過,老婆同情人,係無衝突,去超市買靚少少嘅食材,加支酒,兩個喺屋企食一餐特別少少嘅晚餐,放低手機,開個電視播套戲睇,一邊傾計一邊食,食完一個洗碗一個拖地,再一齊沖個涼啪啪啪,相擁而睡。
 
一切都好簡單,情人節,好多人覺得係一種消費體驗,但一間高級餐廳配上99支玫瑰加個名牌手袋又如何?有冇心,其實好易睇,有心嘅你可以好簡單就令對方幸福,無心嘅洗多多錢,都只不過係better than nothing!
 
講一大埋道理唔慶祝,話日日都係情人節嘅人太多,但絕大部份都係一班得把口嘅粉皮,淨返嘅絕世好男人唔係無,少囉。
 
一眾已婚男士,下年不如同老婆講句:「今日你唔係我老婆,你係我情人!」
 
蔣薇
www.fb.com/maydreaming

COMMENT