2019/04/12

《動物醫院切乳豬迷思》

a1602a
 
網上資料圖片
 
一張動物醫院開張切乳豬相,受到大量批評,本人作為一個有養寵物嘅主人,真係感受甚深。
 
點解一間動物醫院一邊拯救動物,一邊要殺害動物?
 
返到屋企,我第一時間就係餵狗,拎起包狗糧,有牛肉成份,又有雞肉小食,又有魚類配方,我不禁心諗,點解狗又要食其他動物先生存到?
 
世界上絕大多數寵物都係肉食性動物,海洋公園入面嘅魚係食乜?動物園入面嘅獅子老虎又係唔係食齋?唔係喎!點解人類要為咗圈養動物而殘害另一個物種?
 
再諗落去,如果被養嘅動物係自然界咪又係需要獵食其他生命維生。
 
如果你了解到生物鏈你就知道,生命往往係另一種生命嘅食糧,當中無所謂對錯,只為生存,仲有乜嘢係比生存更為重要?
 
首先你要識分,寵物同動物,仲有食用家畜嘅分別。
 
喺日本,小學有一個課題係養一隻小豬到大,再全班人去食咗隻豬,我覺得係一種好好嘅教育,任何一種動物,都可以被視為寵物,牛得、羊得、雞得、魚都得,但養寵物唔等於唔殺生,你只係同呢隻寵物有感情,其他動物你唔可以一概而論,如果你養豬,就完全唔食豬,係一種取態,將佢推而廣之,我尊重你,亦敬佩你,但你將自己一套套喺另一個人身上就完全唔合理。
 
好多人爭執話,你食素又點?植物都有生命,有研究話植物都會痛,咁你又係唔係要因此而改變?
 
同關愛座呢類議題好相似,就係我要做到點先為之好,係唔係有人質疑你就一定要跟,你嘅答案係的話,咁我好想知你一生係唔係為其他人而活。
 
對於動物嘅普世價值,有唔好滅絕一個種族,要奪去佢哋生命的話盡量唔好傷害佢哋咁多,用人道手法去處置。
 
但呢件事比人無限放大之後,你再搵唔到一個絕對正確嘅答案,可能下一秒已經有另一個人提出另一個要你接受嘅方案。
 
動物醫院切乳豬有錯,咁醫生們係唔係要食全素,話唔定佢之前食完個照燒豬扒飯之後再醫你隻豬,咁係唔係要換醫生?唔需要想得太多,佢做好自己責任去行醫,然後個人生活如何,佢無犯法你無權干涉。
 
如果你覺得自己想法先係對的話,你大可以自己開一間大愛醫院,無人會阻止你。
 
雖然你會面對重重困難,但如果你做嘅嘢係好事,點解唔堅持?
 
上網屌兩屌,唔難,世界上仍有千百萬嘅動物因食而死,口中大愛又點?完事之後世界如常,係男人的話,就用自己力量去改變世界。
 
蔣薇
www.fb.com/maydreaming
IG:maydreaming1123

COMMENT