2019/04/19

《原諒之後》

download
網上資料圖片
 
偷食見得太多,太平常,曾志偉都講過,聖人都有錯,更何況係凡人。
 
每一個有外遇嘅人都總有一段故事,我唔係要將偷食合理化,而係想講有頭髮邊個想做熾哥,有幾多人係擁有大好嬌妻感情好到不得了仲出去偷食?
 
所以我好少講偷食係道德問題,而係一種兩性關係問題,從來都唔係一個人無道德而去偷食,真正主因往往係兩人關係生變,有第三者只係加速發酵,錯只係大部份男人都忘記咗,其實你可以分手或離婚先出去玩。
 
一邊聽到朋友講佢老婆點點點差,另一邊又聽到佢新歡點好點好,一獲兩獲可以係貪玩,但持續落去嘅肯定係因為對方補充咗某種佢需要嘅嘢。
 
坦白講,佢想唔想離婚,唔想;想唔想斷新歡,唔想。係,齊人之福有邊個唔想,但真正聽落去你會明多少少。
 
一面有感情,十幾年感情喎,話變就變?但係老婆身上佢得唔到關心同快樂,連自己最喜歡做嘅嘢老婆都完全唔支持,兩個人喺屋企講嘢少,想攬想錫都唔喜歡;另一邊廂,新歡做乜都陪佢,一齊運動,一齊上堂,一齊工作,熱情奔放主動,點搞?
 
好多事都無話黑白分明,佢會質疑咁落去下半世係唔係都係失望,但亦煩惱緊上半世投放係咪血本無歸,旁人好易講,一句,分手,離婚,So easy,因為你根本唔關事,做乜決定你都唔會承受,痛苦亦唔係自己。
 
或者係天意,有邊個可以兩邊暪暪過世,斷正只不過係遲早嘅事,斷正之後,被原諒,咁又點?
 
原諒係難得,但唔代表原諒一個人就可以解決到問題,就好似一個窮人餓左好耐而偷食,你捉到佢,原諒佢,但佢生活無任何改變,過多排咪又係要重蹈覆轍。
 
原諒係難得,呢種路好難好漫長,因為你唔係因為原諒而覺得自己好偉大,對方要感恩之類,而係你要重新重組一段關係,自己要出力,磨合同改變唔係咁易,特別係心中有條刺之後。
 
蔣薇
www.fb.com/maydreaming
IG:maydreaming1123

COMMENT