2019/04/26

《令人生厭的英雄-Iron Man》

ironman_630px
 
網上資料圖片
 
十年前問你識得邊個超級英雄,你會答,超人、蝙蝠俠、蜘蛛俠、狼人呢幾個,當年大家可能仲讀緊書亦者剛剛出嚟工作,有一個你可能聽都未聽過既英雄出現,佢就係Iron Man。
 
用十年前嘅眼光去睇,Iron Man絕對唔討好,喂,富二代,賣軍火,花天酒地,換女換車,佢唔似超人咁純真嘅正義,亦唔會好似蜘蛛俠咁強調能力愈大責任愈大,無狼人嘅悲劇人生,亦無蝙蝠俠嘅低調行事。
 
IM簡直係挑戰緊觀眾嘅道德底線,我創造一條粉腸出嚟救世界你會唔會鍾意呢?
 
IM1之中,贏在RDJ既輕浮浪蕩,各種新式電影手法同科技展示,最後加上一句人人以為佢會隱性埋名地做佢嘅IM最後突然當眾認咗嘅型,為MARVEL打開MCU嘅開端。
 
初初既IM的確係粉腸,即使佢面對困難改變咗自己心態,賣武器嘅罪過由佢行俠仗義去還,佢都只不過係為自身,講情操,美國隊長比起佢強得多,所以當時A1隊長曾經指責過IM自私,唔識得為世界貢獻。
 
直到佢帶住核彈衝向敵人之中,再由天跌返落嚟時,隊長扶佢嘅時候,佢證明咗自己唔係自私,佢都可以犧牲。
 
到IM2時,佢充滿不安,因為佢知道原來宇宙有好多侵略者,地球就算有佢都唔會安全,認識到自身係幾渺少,佢自暴自棄,然後希望以奧創去增強實力,點知最後搞到一大班人傷亡,導致美國隊長二嘅決裂,佢認為英雄係要管,佢要團結一切去對付外星敵人,同樣地,以失敗告終,令復仇者解散咁滯。
 
去到無限之戰,佢哋終於要直接面對thanos時,幾乎係無反擊之力,明知打唔贏IM都要同佢對打,甚至諗住犧牲自己叫奇異博士唔好救佢,保住粒石。
 
截到呢個劇情,之後就唔講了,但大家從咁多套戲之中會見到,IM一直都係度改,由粉腸變成英雄,由自私變成大愛,最後美國隊長喺佢眼前都黯然失色。
 
每一次人類利益同自身利益係眼前時,佢都選擇犧牲自己……
 
IM用另一個形式去展示壞男孩成長記,相比下超人玩到尾反而要玩返黑化真係相映成趣。
 
陪住我哋成長嘅IM,大家睇住佢改變,用十年時間比你了解佢,亦正正係漫威眼光之強。
 
最後我要重溫返IM1時佢最後講嘅一句,I am Iron Man,由你認清自己一刻,你先會變得強大。
 
蔣薇
www.fb.com/maydreaming
IG:maydreaming1123

COMMENT