2019/05/03

《人誰無過?》

20190430_EN_杜汶澤_程美段01-1
 
網上資料圖片
 
上星期杜汶澤同程美段嘅羅生門令大家食盡花生,最後程美段大勝,杜汶澤金盆洗X作結。
 
香港人每日都係一個尋找仆街的故事,搵出仆街,屌到佢仆街,再搵下一個仆街,上一期係許志安同黃心穎,今期係杜汶澤同程美段,下一期呢?
 
件事叫告一段落,但係杜生嘅道歉上,明顯有人係好不滿。「咁就完喇?」「咁叫道歉?」「我唔理,呢條友以後都black list!」令我不其然思考,究竟點先為之一個正式嘅道歉?
 
Facebook Page唔算,個人pages唔算,節目上面親自道歉都唔算!分分鐘以死謝罪都唔夠,話點解要比佢死得咁痛快!
 
人誰無過?我唔相信人可以一生都清清白白,無做錯一件事,小朋友時你做錯事,會俾你改過,但人大咗,呢塊免死金牌就無咗,由普通級直升地獄級,只要你行差踏錯一件事,都可以令你永不翻身。
 
除咗唔做唔錯之外,我相信無乜嘢係可以絕對避免過錯,每個人都有唔同經歷、性格、圈子、習慣,而好多事唔係單單自身,有時你係某情況之下,某心情之下都會做出平時唔會做嘅事,又或者俾身邊朋友玩你一鑊,喺兩難之下做出一個無咁錯但都係錯嘅決定。
 
網上嘅道德標準係直指天際,網上全部都係聖人,因為佢哋係邊個你唔會知,大家都以上帝審判罪人為樂,所以你衰都唔好衰上網,唔係嘅話小事放到超出宇宙都可能。
 
所以網上嘅人講乜,你要跟,跟死你啊!唯有係自己拎一個標準去處事。
 
錯,道歉,只係第一步,原諒一個錯誤其實好廉價,但你嘅錯帶嚟嘅後果同罪過影響到人、傷害到人就已成定局,唔會憑你一句對唔住而改變,呢個因,令你需要付出更多時間精神去還呢個果。
 
而你盡力去還,已經係可以做到嘅最大負任,亦係時候要前進,唔再糾纏喺一個過去之中,如果一個錯誤令你一生都要背上包袱,咁你又點行落去?對於死追不息嘅花生友,你可以做嘅就係無視,然後做返對當事人最有用嘅事,係咩事你自己同當事人決定。
 
恩怨係兩個人,要平息亦只有兩個人,外人可以說三道四,但唔係應負責任之中。
 
作為網友,做乜都可以,畢竟無人知你邊個,但你仇恨一件與你無關嘅事,只不過係將業放上自己身,有需要嗎?
 
佛家叫人放下,你唔單止連自己都放唔低,仲背負住其他人嘅事,辛苦嘅,只有自己。
 
蔣薇
www.fb.com/maydreaming
IG:maydreaming1123

COMMENT