2019/05/10

《如何成為更好嘅男人》

05-054641-10_better_man_predictions_for_2016
 
To be a better man,係MenClub嘅口號,最近我有朋友啱啱失戀,低落之後佢痛定思痛,揚言要成為一個更好嘅男人,聽落係好事,但實際上……
 
「我想自己五年後會變成更好嘅男人!」呢句說話聽落好聽,就好似我要成為海賊王一樣,應該係出現喺一套熱血漫畫入面,之但係現實上你講呢句嘢又係點呢?
 
作為都三字頭嘅人,有時對呢種口號式嘅目標係幾反感,做得人耐就知,你想做乜都唔係問題,但重點應該係你點去做到呢件事,而當我哋問多幾句,咁你嘅目標係點啊?點為之一個更好嘅男人?佢會話搵錢、擴闊眼界、加強歷練、成熟穩重咁……
 
唔……細分咗少少,咁點去做呢?唔……未諗到……
 
咁就要分享一下管理上面嘅理論喇,今次講到嘅係MBO, KPI同OKR。
 
MBO係目標管理,其實同我朋友現時嘅情況好似,朝一個目標進發,自動自覺,但有個問題係目標通常都係比較難以量度,點為之一個更好嘅男人?搵更多錢?即係幾多?所以引申咗另一個理論,即是KPI。
 
KPI強調指標、考核、結果上面,將好多事都以數字量化,最後令大家可以清楚知道自己到唔到數,用咗咁耐相對大家都對呢個名詞唔太有好感,因為KPI係一條數,你要追數咁又要問點追?定太高定太低令件事好海鮮,有冇試過到數之後上司老闆即時加大下年條數,然後要你再衝大條數?努力去做一件事係可以有增長,但增長總會有盡頭,去到臨界點時就會引起不滿,亦會運用更多奇怪手段去到數,有時係為追而追,殺雞取卵。
 
呢幾年Google行緊OKR,中文係目標與關鍵成果,同KPI唔同之處係,唔單止係追一條數,而係團隊之間商討好要做嘅事,點去取得成果,確保大家可以得到一致嘅目標,同時亦係大家接受嘅範圍。
 
舉個例,我要溝到女,係一個MBO,我要幾時溝到,溝到個有乜條件嘅女就係KPI,而OKR係,我每個星期花三個鐘去健身,每個月花費三千去聯誼,每個女仔都嘗試約出嚟食一個飯,從而達到你想溝到女嘅目標。
 
當你有清楚嘅行動時,你要達成目標就會相對有動力。
 
不過我相信我朋友佢都係興之所至,作為朋友,聽吓佢講,佢講完已經好舒服,你已經盡咗朋友責任。
 
蔣薇
www.fb.com/maydreaming
IG:maydreaming1123

COMMENT