2019/05/17

《球員與教練》

WhatsApp Image 2019-05-17 at 2.54.02 PM
 
網上資料圖片
 
我好記得中學時有個出名唔識教嘅老師佢有次同我哋講:「如果比隊巴西我教我都拎到冠軍啦,只可惜你哋係中國隊咋!」呢句我記足佢十幾年。
 
每年足球聯賽花落誰家之時,亦係一個搵戰犯嘅時間,每隊都會上演,特別係強隊內發生得更激烈。
 
球員埋怨教練唔識教無策略無組織,教練話球員唔合作無實力亂咁嚟,明明論牌面根本唔差,食硬人,點知最後輸俾榜末隊伍,再一次搵戰犯,然後話要離隊換教練之類。
 
玩運動最忌係咩?就係自己隊入面都嘈,我好少見一隊內部不和嘅隊會有好成績,運動要講合作、士氣、戰略,一嘈就三樣都做唔到,明明有機會都無把握,一輸波就屌後面,咁後面咪玩攬炒囉;無入波又屌前面,你嘈多兩吓一比人入波我就屌得你再大力啲。
 
有套日本漫畫叫《One Outs》講棒球,主角球隊係一支曾經好有名但現時只係中游,贏輸都唔知原因嘅隊伍,直到強橫主角加入,慢慢從心態上面改變球隊,最後帶領住球隊拎到總冠軍,過程鬥智鬥力好睇,但佢亦講到作為一隊波,教練同球員嘅心態應該係點。
 
好多時輸波,係你根本唔想贏,內鬥係好好例子,我唔喜歡教練想佢走,咪踢得差少少迫佢無成績要走囉,球員之間不和,明明有得傳都唔傳等佢無表現踢走佢。
 
有時候你局外人都睇得出,呢班粉腸都唔想贏嘅。
 
故事入面為咗對抗主角,有一隊明星隊出現,粒粒皆星,但不和令佢哋實力上加埋仲打咗折扣,人人求表現但又唔肯合作,只想做最強嘅人而犧牲隊伍利益。
 
教練面對大支嘢球員又係講乜都無用,你講波嘅識q踢波咩!戰術唔執行,無成績時又可以賴教練戰術差,換咗佢啦!
 
主角隊雖然教練廢,但球員都唔算標清,只係憑上下一心士氣波打返嚟,好似當年李斯特城咁,就算你唔係佢支持者你都會欣賞佢哋,因為佢哋真係認真對待一場波。
 
英超落幕,與其搵戰犯,不如諗吓自己有冇認真對待過每一場球賽,盡好自己責任,諉過於人,非男人所為。
 
蔣薇
www.fb.com/maydreaming
IG:maydreaming1123

COMMENT