2019/05/25

《愈來愈沉默的男人》

unnamed
 
網上資料圖片
 
有冇發覺男人愈大就愈少講嘢?Facebook好少講自己嘅事,出嚟食飯亦愈來愈少呻,有乜唔開心都係留比自己?
 
以前有乜事我哋都會呼天搶地,身邊父母、朋友都會關心你,安慰你,幫助你。
 
但依家嘅我哋發現有乜問題已經唔再係可以靠身邊人幫你手解決,而你亦唔好意思去搵人幫手。
 
我哋好少講嘢,係因為唔想身邊人知道自己過得唔好,唔想父母擔心,唔想朋友覺得你過得唔好,同時你父母、老婆女朋友同埋仔女都係需要依靠你時,你寧願將一切都攬上身都唔想比壓力佢哋,反正講完都唔會幫到乜,無謂令人同時煩惱。
 
好多時收工你會一個人係街行,無目標地走,你想有一個寧靜嘅時間去思考點做,望住窗發呆,究竟問題可以點解決……
 
一個男仔轉化成男人嘅時間就係,你從一個依靠者,變成被依靠者。
 
以前睇熱血漫畫成日都會講,我嘅力量來源就係為咗保護重視嘅人,愈多人要保護你就會愈強。
 
係,無形壓力下你一直變強,但同漫畫唔同嘅係,唔係一句口號就變強,唔係奇遇令你更強,而係每一日嘅苦難、鞭打令你成長。
 
如果你見到一個男人唔講嘢,唔需要做乜,只需要比佢靜一靜,然後再同佢講:「我對你有信心,有乜事都有我。」就可以。
 
世界上每個人都有唔同嘅煩惱、困局,你唔係唯一一個悲情主角,你嘅痛苦好多人都經歷過,同時好多人都捱過咗。
 
諗返起細個時,老豆一個人喺廚房食煙唔知做乜,到今日我明白既然無嘢好講,不如靜靜咁食支煙,喺心入面同自己傾訴,鼓勵自己。
 
蔣薇
www.fb.com/maydreaming
IG:maydreaming1123

COMMENT