2019/05/31

《兄弟,保重》

3047437552415a743246
 
網上資料圖片
 
男人每段時期都有唔同嘅煩惱,十幾歲為學業、為愛情;廿幾歲為工作、為結婚;三十幾歲呢?
 
踏入三字頭,唔單止你會為事業而煩惱,仲會為健康而無奈……
 
健康,重唔重要?重要,但年輕力壯嘅我哋唔會點去理身體,有冇留意長輩圖入面通常都係身體健康,平淡是福,年輕嘅我哋會一笑置之,但當你踏入三字頭,你身邊嘅同輩身體出現問題時,你就會發現原來人係可以咁化學……
 
肥,曾經係我哋對健康嘅唯一煩惱,亦唔會諗到健康,只係停留係外表層面。
 
三字頭,少甜是常識吧,少鹽最好啦,煙酒可免則免,捱夜更加唔好預我。
 
健康嘅價值,隨住你每一次進入醫院,可能係自己身體出問題,又可能係朋友親人身體出問題,每一次離開醫院之際,健康嘅價值都會隨之增加。
 
有人話錢可以解決嘅問題唔係咩問題,健康係錢解決唔到,喺病床旁,你有錢又點,幫到咩,買藥比你食?搵醫生睇你?無用,當你聽到醫生講:「唔……食咗會唔會好我都唔知,但應該有幫助嘅。」十萬一個月你都要比,比唔起當然更痛苦,因為你連唯一希望都無。
 
望到你兄弟瞓喺床上面,曾經同佢踢波打機飲酒傾通宵上刀山落油鑊嘅佢,雖然面帶笑容,你只可以扮無嘢咁同佢閒話家常,有冇嘢幫到手?無喎,你又唔係醫生,人生之中最大嘅無助就喺呢度感受到,你第一次發現有嘢係你點做都做唔到,幫唔到。
 
平安是福,最緊要身體健康呢種長輩圖,突然變得聊勝於無。
 
你要知道經歷過幾多苦痛先會覺得平安健康係對自己同身邊人最緊要。
 
兄弟,健康緊要啊,下次唔唱通K喇,改做行山啦;不如唔好飲酒,飲吓茶都好喎。
 
兄弟,保重。
 
蔣薇
www.fb.com/maydreaming
IG:maydreaming1123

COMMENT