2019/06/07

《那年的切爾諾貝爾》

WhatsApp Image 2019-06-07 at 1.33.01 PM
 
網上資料圖片
 
就喺大家都沉痛喺權力遊戲最終季嘅傷痛之時,HBO推出咗一套極高質嘅劇集--《切爾諾貝爾》。
 
作為一套歷史還原嘅劇集,佢無帶俾你一種沉悶說教嘅感覺,反而令你好似置身於當日發生災難嘅現場,作為一個旁觀者一齊推進事件。
 
今日切爾諾貝爾日仲係一座死城,人類幾乎絕跡於呢個地方,大約三十幾萬市民要撤離,難以計算嘅傷亡死於幅射之下,到今日你享受緊核能帶俾你嘅方便時,其實曾經出現過一場災難令大家對於核電影響同破壞有更深認識。
 
意外係難以避免,意料之外你只可以降減危險而唔可以杜絕,但意外無得避,人禍呢?切爾諾貝爾正正話你知一場意外加上種種人禍令災難發生嘅故事。
 
我唔怕劇透,因為只要你對歷史有認知都會知道大約來龍去脈係點,而你知道嘅話亦無損觀看感覺,因為令你感受最深嘅係成個氣氛、張力等等。
 
核事故出現,有好多方法可以收拾殘局,但官僚之中,做決定嘅人對於核知識幾乎一無所知,仲要追求面子,家醜不出外傳心態去處理,以及國家最終會搞掂,相信就可以,此乃人禍。
 
但劇中除咗令你感受到人禍之外,仲令你感受到人性光輝……
 
你會見到一班消防員喺不知情下撲滅大火,無任何防護衣下直接接觸核幅射最後死於非命;
你會見到三個人明知必死無疑但為咗令救亡工作順利而自願進入反應爐地下窒打開排水閘;
你會見到有一班礦工赤裸裸地喺反應堆下挖地道,等工作人員可以順利換到部件……
 
好出名嘅電車理論,如果依家有一架電車準備撞向五個人,你可以控制佢去另一條路而只係撞死一個人,咁你會點?
 
而劇中好多人係選擇換路撞死一個人,而呢個準備死嘅人都只係默默接受死亡。
 
世事唔係電影,無大團圓結局,最後留低嘅係一個個陌生名字,佢哋奉獻咗生命出嚟,為嘅唔係自己,而係呢個地方,呢度嘅人。
 
歷史災難之中,無超級英雄救世,只有無名英雄係長河中留低名字。
 
蔣薇
www.fb.com/maydreaming
IG:maydreaming1123

COMMENT