2019/06/28

《圓夢》

0628 may menclub
 
網上資料圖片
 
模型、動漫、遊戲等等,都係男人曾經嘅興趣,應該每個男人都試過收集一系列嘅愛好,最後人大咗,慢慢就遺忘、放棄。
 
係youtube上面,你會發現有唔少外國youtuber可以將興趣推到極致,我睇過一個專門鑄造動漫、電影等武器嘅channel,你會睇到佢由一舊金屬,燒紅、打鐵、冷卻、再燒、加工、開鋒,最後變成一把武士刀、十字弓、大鎚,然後再實際地用俾你睇。
 
又有人會將木頭慢慢割開、磨平、削斷、組裝,你連一粒釘都見唔到就完成一張椅一張桌子;用泥去砌一間屋,再入去住;將布染入一層層,再變成一件時裝……
 
每次見到類似既片,我都會讚嘆原來有人可以將一件你睇落平平無奇嘅事由頭到尾展示俾你睇到。
 
但香港好少人會有心去做咁細緻嘅事,因為大家生活都太急促,市面上好多內容都係吃喝玩樂,但好似外國呢種深度式嘅片就甚少見到。
 
有人問,點解香港無呢種youtuber?又問點解外國會有netflix,但香港只係得tvb,其實有乜觀眾就會有乜供應,你估無人做過內容為主咩?有,但做完死埋你都唔會知道,最後就話呢個地方無呢種供應。
 
香港壓力太大,工作已經令你透唔到氣,放假娛樂自己係一種補償,仲要用心去研究一種興趣?真係好難,再講,邊有空間做?唔好講鑄劍,你連屋企放多幾個高達都唔夠位,除非你可以好似古天樂咁有錢,可以租個大地方去放置啦。
 
從遊戲睇已經感受到大家嘅改變,以前我地會自己打機,然後打一堆唔多駛練嘅,課金就已經玩到嘅遊戲,再後來連禁都唔想禁,連練都懶,所以依家十隻有九隻都係咩「放置」式遊戲,到最後,不如睇吓人打機算啦,睇完當玩咗。
 
年過三十,仲有幾多人可以講得出一種興趣?真係用心去玩去研究嘅興趣?如果有,恭喜你。
 
依家愈來愈多玩具係面向成人,因為商家都知道,我哋有錢,但空虛,就好似賣保健品俾老人家一樣,心理作用,健康功效,幾錢都好,買咗先講。
 
當年我哋無錢,一件兩年玩具都玩一日,依家一櫃都係,但我哋只會靜靜咁望住佢哋,唔會再有咩幻想,亦唔見得興奮,但總係聊勝於無。
 
蔣薇
www.fb.com/maydreaming
IG:maydreaming1123

COMMENT