2019/07/05

《好老公都係前度教出嚟》

2019_07_05_May Menclub
 
網上資料圖片
 
每一個女人都夢寐以求好老公,但有幾多男人係天生就完美?無!幾乎所有好老公都係被佢哋嘅前度一手一腳教出嚟,再送俾下一手接收。
 
女人,永遠係男人最好嘅老師。
 
我相信無一個家長會教導子女點去拍拖,點同異性相處,有都只係簡單幾句,初戀都係由跌跌撞撞之中得到,兩個人相戀,到互相傷害,再痛苦分手,一段又一段感情講白少少就係磨擦同成長,失戀之後,男人都好似撒亞人咁進行一場進化,然後再進入戰場,重覆一次過程。
 
女人們,當你哋讚嘆一個男人肯主動送你返屋企時,應該欣賞佢前度教得好,訓練到佢哋自動自覺;男人肯喺大時大節之中送上合適隆重禮物時,你唔會知佢之前曾經送出過幾多垃圾禮物;車、樓、投資等等,可能係前度們迫佢哋得出嚟結果。
 
一番甜言蜜語、一次機智完美對答、一餐高級美味晚餐。
 
入世未深嘅妹妹會好開心,因為佢哋只睇到眼前嘅好事;有戀愛經驗嘅會諗甜言蜜語會係第一次同自己講?傻啦!你又會識嚟呢間餐廳?之前嚟過幾多次啊?
 
睇得清嘅成熟女性,對於男人嘅甜言蜜語受樂之餘,亦會好清楚係一種訓練,一種習慣,自己唔係特別嘅一位,不過佢哋會閉口不談,免得打破呢種氛圍。
 
當男人諗返每一個行動係嚟自邊個時,就會感嘆萬分,回首每一個令自己成長嘅女人,我哋由經常被鬧嘅小男孩,成為一個女人無可挑剔嘅男人,路途之上有幾多個導師?佢哋令自己改變,變得識理會人感受,會放棄部份原則,會吞聲忍氣,會防患於未然,會製作浪漫驚喜。
 
好似工廠生產線一樣,一個又一個女人對男人進行加工塑造,完成出廠之日,送到一個客戶手上。
 
男人喜歡砌模型,因為過程都係一個享受,完成後放喺屋企欣賞;
 
女人喜歡名牌手袋,一嚟就可以用,帶出街可以威。
 
所以女人們唔好問點解次次要幫人教仔喇。
 
蔣薇
www.fb.com/maydreaming
IG:maydreaming1123

COMMENT