2019/07/12

《放榜的青春》

2019_07_12_MayMenClub
 
網上資料圖片
 
步入中年,放榜好遙遠,但每次到呢個時間,我都會諗起當年嘅往事。
 
仲記得當年成班同學約咗唱通宵k,十幾人一齊拎正牌出去通宵,唱完一首又一首嘅歌,然後五點幾關門就出去周街行,等食早餐,食完一齊返去學校拎成績,一個一個聽到名行出去,然後有笑有淚行返埋位,打個電話返去報成績。
 
我哋學校唔係咩勁中學,所有唔會全部人留低,有好成績嘅都好貼心咁低調,唔會喺班人喊到豬頭時攞景,拎完成績,大家一齊去食嘢,食乜已經唔係好記得,步出呢個校園,你知道之後已經唔會再以學生身份踏進,而呢班同學亦唔會每日準時八點見到。
 
咁多年中學生涯要結束,總有好多歡樂同遺憾,多年暗戀對象表唔表白好?呢班同學又會唔會成日見?老死要去外國讀書,自己又何去何從?
 
放榜意會人生第一次好到肉嘅改變,你將會去一個全新嘅地方,接受一種未見過嘅模式,認識一班完全陌生嘅人,而你自己亦可以從頭開始。
 
讀書只係人生中嘅一小部份,好多年後就會發現,其實都唔算得係乜,今日大家都習得一身好好嘅抗壓力,面對問題會頂硬上,面對改變會順其自然。
 
但有時你會好懷念當年呢種緊張嘅心情,仲有嘢會令你瞓唔著,仲有嘢會令你記成世,仲有嘢會令你喊出嚟,今日你要再搵返呢種感覺都幾難。
 
到今日,我哋只可以間中聚會,飲完食完就進入懷舊環節,講返中學時嘅人,問你記唔記得邊個邊個,講吓近況,然後大家再拎返當年笑話、老師、舊情人講,笑完一輪,下次又再重覆一次。
 
如果可以再約返班同學,唱個校服通k,唱返當年嘅舊歌,然後扮返學生一日,回憶一吓放榜嘅青春,咁就好了。
 
可惜,唔會有人會理鳩我,各有各忙,不了。
 
蔣薇
www.fb.com/maydreaming
IG:maydreaming1123

COMMENT