2019/07/19

《移民》

2019_07_19_Airport_May
 
圖片來源:蘋果日報
 
聽老豆講,當年九十年代回歸有移民潮,好多朋友都移民,呢兩個月,幾次聚會都有不同朋友講移民,終於感受到當年佢嘅情況……
 
土生土長香港人,要移民貪乜?唔係去貪人福利拎著數,更唔係有更好發展所以移民,只係對呢個地方不安感太大同埋失敗透極。
 
連我老豆都話,諗吓移民,我一聽,移去邊?美國?英國?加拿大?澳洲?地方都係其次,但我去到可以做乜?一切都要重新開始,我會諗去到搵唔搵得返依家嘅錢,屋企人呢?老豆老母去到英文都唔識可以點?去買餸都要揸車點算?外父外母呢?親朋戚友呢?
 
讀書時好嚮往外國,但去完外國住,環境係好,生活係舒服,但人離鄉賤,總會記住香港嘅種種,仲記得當時去澳洲花好多時間買料想整返譚仔個湯底,但始終唔同;仲會特別去唐人街唱K,不過唔係同班豬朋狗友唱,真係開心咩?
 
好多講得好灑脫要移民嘅人,通常都無長時間喺外國生活過,旅行係開心,但時間一長總有好多嘢惦記,新朋友再好,佢都無你成長嘅經歷,然後每次約聚會,你都身處外地,只可以留句玩得開心,心中又會好受嗎?
 
絕大部份移民嘅都唔係為自己,而係為下一代,早一日過去,佢哋就可以係外國建立自己成長圈,免除好多陣痛。
 
有朋友已經申請咗移民,下年就會舉家去澳洲,真心為佢哋高興,因為佢脫離咗一個可悲嘅地方,至少唔需要每個星期出去爭取權利。
 
但更多人係無得選擇,有不捨,亦有欠缺能力,唯有繼續守護一個地方。
 
叫人唔喜歡嘅就移民嘅人唔會理解要離開一個自己生長嘅地方係有幾難受,亦唔明當中做咗幾多掙扎。
 
好記得當日朋友講咗一句:「呢個屋企我係唔捨得,但我已經盡力做咗,但改變唔到咁唯有我走。」
 
我無做和事佬,講幾句相嗌唔好口,家和萬事興之類嘅說話,只係講:「掛住屋企咪返嚟坐吓囉,有乜事我都歡迎你。」
 
當呢個地方無晒熟人,或者我都會無所眷戀,但一日仲喺度,一日都仲要打理呢個家。
 
蔣薇
www.fb.com/maydreaming
IG:maydreaming1123

COMMENT