2019/07/27

《男人,有時候只需要一句讚賞》

shutterstock_204625375
 
網上資料圖片
 
想人讚,係一件旁人睇幾唔男人嘅事,但唔好講男唔男人,不分男女都需要讚賞,但男人想人讚就係一件肉酸同不合理嘅事。
 
男人喺外面有幾辛苦幾大壓力都好,都想有一個避風塘,幻想一吓你忙完一日,返到屋企仲受到責罵會係咩滋味?頂硬上,一日、兩日、三日、一星期、一個月呢?你會認為呢個屋企唔再舒服,因為只有壓力。
 
一入門口,唔係今日做嘢辛唔辛苦啊?辛苦晒你喇;俾低家用時,唔係一句辛苦晒,而係一句下個月請準時俾。一切一切都變得奉旨,咁有意思咩?
 
俾家用,係應份嗎?不,呢個世界無嘢係應份,即係兩個人結婚,家用係責任,但一份責任伴隨嘅係一種身份、一種認同、一種感激,有權利有義務,所以每份義務同責任,都應該有所回報,唔係求乜,學天哥講,完事你叫返聲honey得唔得?唔得!叫聲honey好難咩?如果叫一聲honey可以每個月收家用,我每日叫,見人就叫,叫到我失聲為止。
 
男人都係人,喺外面俾人屌,你會心諗,有錢收嘅,咪吞聲忍氣囉;但返到屋企,都係俾人屌,你就會諗點解自己咁犯賤,俾錢人仲要俾人屌。
 
男士們,有冇聽過一句成語《相敬如賓》,大約意思就係夫妻相處融洽,互相敬愛到好似當係賓客咁。
 
但今日女人點諗?吓?兩個人一齊當然要真性情,當你客人咁即係生疏啦,最好就係直接到位啦!聽落有冇熟悉感?不過我要補充一句,真性情係女人專利,你想真性情佢就會屌你係咪傻撚咗啊!
 
兩個人一齊,大家互相愛護開開心心係唔得,女人睇好多嘢都係唔順眼要屌要鬧,男人見到有問題,望一望,搞掂佢,靜靜地處理。
 
當你做得好時,你得唔到讚賞,你自然會諗,咁我做嚟做乜?咁不如唔好做啦!到女人發現你無做時,佢就會問點解你唔做?你想講句,吓?奉旨啊?不過你無出聲,因為你知道佢真係奉旨!
 
今時今日,分手又好,離婚又好大把,究竟有乜勇氣令班女人覺得任何事都係奉旨?
 
我唔係要教人分,我要重申,女人們,做人又好,做人老婆女朋友都好,凡事感恩,見到對方為你做野,唔係要你十倍奉還,洗個碗,執頭髮都好,講句唔該,講句辛苦晒。
 
我想問,講一句嘢,真係咁難開口咩?你嘅讚賞真係咁昂貴嗎?
 
蔣薇
www.fb.com/maydreaming
IG:maydreaming1123

COMMENT