2019/08/03

《執頭髮》

1-1P3040JS6
 
網上資料圖片
 
婚後生活,你第一樣要習慣嘅就係有大量頭髮,其實男女都會甩頭髮,但長頭髮同短頭髮真係相差好遠,短頭髮你唔會覺,長頭髮係會纏住你手、腳、椅腳、牆角、去水位等等累積……
 
當你第一次見到成個去水位都係頭髮時,你會諗起日本恐怖片,你唔知到底一拉會拉到乜嘢出嚟……
 
問題係好多女人都無自己執頭髮嘅習慣,或者呢種幫對方執頭髮佢哋會認為係愛的表現,如果你好直白咁同佢講,自己頭髮自己執,你會花上n倍時間去同佢嘈呢個好簡單嘅責任問題,已經夠你掉足半年頭髮時間了。
 
執頭髮其實唔係一樣難事,男人自己甩頭髮積得耐都要執,我本來以為一個相同任務,直到……
 
有一晚我執頭髮時,發現上面有一舊舊黑色嘅半凝固物時,我以為係咩染髮劑定海澡磨砂,大叫老婆入嚟睇之時,佢好自然咁講咗句,哦,M血嚟,執咗佢啦。
 
吓?吓?吓?我足足吓咗三次,然後望住佢,佢講,仲唔嗱嗱聲?我繼續吓,喂,M血嚟喎,我咁大個人見到衛生巾都退避三呎,衛生巾都叫已經吸咗入去裡面,依家你叫我直接接觸佢?我以後仲駛唔駛買六合彩?俾我班兄弟知道仲會點睇我?以後我同客握手佢哋會唔會拒絕?
 
但我從佢眼神之中已經知道呢件事已經決定了,我避唔到,如果理論的話肯定無好收場。
 
所以我去廚房拎咗對洗碗手套,一個月執一次都係有限錢,我認。
 
但正當我咁好唔願意咁戴上手套時,佢用紙巾一手就夾起咗,然後放落我仲未戴手套嘅手上面。
 
呢吓我覺得好似回魂夜入面,李力持佢用手督屎之後,唔驚啊,但比人一舊屎抹係塊面上面嘅大叫!
 
做乜啫你!!!!!!
 
正當我想爆發時,佢突然話,呢樣嘢係我身體入面形成嘅,平時你身體形成嘅成日要我掂,要我乜乜乜,我有冇埋怨過你半句?依家我唔係叫你食喎,執你都咁計較?好,咁下次你嘅嘢我著返件保護衣,戴返手套囉!
 
唔……我心中有好多嘢想講,但我忍。
 
佢後面補多句,想我唔嚟M你知有乜辦法,你想唔執嘅咪行動囉。
 
屌,我無言以對。
 
蔣薇
www.fb.com/maydreaming
IG:maydreaming1123

COMMENT