2019/09/27

《男人戀愛五部曲--暗戀》

2019_09_27_May MenClub
 
網上資料圖片
 
有人話,初戀無限好,但比起初戀,第一次嘅暗戀更令人刻骨銘心,往往暗戀都會發生喺學生時代,喺著住校服嘅青澀歲月。
 
第一次被異性吸引,喺電影、小說被戀愛故事所影響,你會嚮往一場驚天動地嘅戀情,但你會感到無從入手,只可以遠遠咁遙望住呢個人,靜靜地等待戲劇性一刻。
 
暗戀之所以令人回味,係因為時間拉得好長,或者係三五年,甚至係十年八年嘅暗戀,你會將遊戲入面女角名改做佢個名,你會偷偷印佢嘅相放喺銀包深處,你會默默睇佢社交平台更新,你希望知道佢嘅一切,從中你盼望可以搵到自己嘅一個席位。
 
有一次你不經意同自己兄弟、朋友、同學透露出自己嘅暗戀,大嘴巴嘅佢哋當然唔會放過呢個機會,好快全世界都會知道你暗戀佢,有時講起,佢會扮聽唔到,亦會扮無嘢,同你好似正常交流咁。你覺得好驚,怕自己被拒絕,結果好似無事咁,然後每次被人講起呢件事時,你都會暗暗開心,甚至瞓唔著。
 
終於,有好事之徒約唱K,約睇戲,將你同佢拉埋一齊,第一次出街,你扮晒係同兄弟講嘢,而佢亦只同姐妹們傾計,但你亦好留意佢一舉一動,搵緊一個機會同佢傾計。
 
年少無知嘅自己,連接近佢都會覺得有種窒息感,好想扮無嘢,問起你都會話唔係,仲特登迴避,真係可以話係少年太年輕了,比著三十歲嘅你睇返,你會覺得直接約、直接講就搞掂啦,但亦正因為咁,先係青春,先係暗戀,可能睇得太多狗血電影令你覺得欠缺儀式感嘅戀愛無價值。
 
升班,升學,每日朝夕相對嘅時間終有結束,你會諗,不如喺最後一日表白,只係諗,因為到時你都係無膽講出呢句說話。
 
呢段暗戀,亦隨住大家各散東西而結束。
 
多年之後你再次見返呢個人,可能係十年、廿年之後,大家已經各有生活、情人、家室、子女,你已經可以好灑脫咁講。
 
「你知唔知我當年鍾意你?」
「知,但你當年無講出口。」
「無辦法,年少無知嘛,哈哈。」
「如果你當年講咗,你估我哋會唔會一齊呢?」
「如果講咗,今日我哋個仔同女叫咩名我都諗好咗喇!」
「你同當年一樣咁低能!」
 
兩個人,重溫暗戀嘅感覺,完場之後,各自歸家,或者當晚會發一個如果嘅夢。
 
蔣薇
www.fb.com/maydreaming
IG:maydreaming1123

COMMENT