2019/11/08

《老屎忽》

杜汶澤陳百祥7
 
網上資料圖片
 
陳百祥大戰杜汶澤一戰,都算係一場可以挑戰當日許志安記者會嘅一場直播,當日喺客公司一到四點半大家停晒手一齊睇,抱住食花生心態去睇呢場明知係你有你講,我有我講嘅泥漿摔角。
 
呢場不單單係藍黃之爭,仲係一場世代之爭,俾面陳百祥佢都算係九十年代紅極一時嘅笑匠,但三十年後佢成為老屎忽之後,你會發現佢每句說話都會令你反盡白眼,唔好話講笑,你可以忍手唔打佢都算好本事。
 
同老屎忽傾計,你首先要知道佢會先放出一副阿叔食鹽多過你食米嘅嘴臉,坐係度,唔係傾啊,係教精你啊細路,所以唔係一場辯論,而係一場show,佢只係要講自己嘅睇法,強迫你跟佢套嘢,你唔跟?佢會覺得你自己走寶,如果你想佢聽你講?傻的嗎?
 
你同佢講數據,佢同你講因果,你同佢講因果,佢會同你講情感,你同佢講情感,佢又同你講返數據。
 
佢唔會同你拉喺同一個擂台打,而係帶你遊花園,遊到咁上下,連杜生就一頭煙,老屎忽唔會同你講邏輯,只會將你智商拉低,最後你只可以選擇走人唔浪費時間,而佢就會好似勝利者咁留喺擂台話自己贏咗。
 
老屎忽嘅問題係,佢唔會聽你講,同職場上人生中嘅老屎忽一樣,佢只會有自己一套,所以點解老屎忽咁討厭?因為佢哋第一,唔會聽後生嘅講;第二,佢唔會聽你講你哋睇法;第三,佢更唔會代入你情況去思考。
 
佢從來都唔會諗後生點解會咁諗,所以佢脫節咗好耐,仲停留喺當年風光之時嘅感覺,覺得自己當年幾威幾威,今日上位後用返同一套都可以work,陳百祥有個位要讚,佢無再拍戲,可能佢知道自己已經唔再適合呢個世界,唔會再有人因成佢而笑,一日唔落手,佢都可以喺幻想上延續自己嘅風光,但呢種人一世就完,佢唔會再有更多成就。
 
比起老拍檔周星馳,心態上佢真係差太遠,周星馳起碼唔會原地踏步,肯去試,肯去闖,有人讚有人罵都好,佢都係活喺現在,但陳生佢只可以活係當年。
 
可怕嘅係,你同我有一日都可能成為老屎忽,而自己唔會知道,當你有日成為老屎忽之後,你表達你意見而後生唔受時,你又會唔會可以放低身段去聽人講呢?
 
蔣薇
www.fb.com/maydreaming
IG:maydreaming1123

COMMENT